Siglir tar il cuntegn

Header

cuntegn

Cifras e svilups Situaziun actuala

La situaziun enturn il coronavirus sa mida extrem spert. Perquai porscha RTR ina survista grafica.

Betg mo la Svizra cumbatta actualmain cun dapli cas da Covid-19, mabain era auters pajais. En la grafica pudais Vus selectar enfin sis pajais per cumparegliar la situaziun:

Situaziun en Svizra

Per pudair dar ina survista da l'entira Svizra, va RTR la medema via sco SRF: La grafica sa basa sin datas da l'Uffizi federal da sanadad BAG e vegn actualisada automaticamain da glindesdi fin venderdi mintgamai enturn las 13:30 (detagls da funtaunas a la fin da l'artitgel).

Ina sfida centrala en la pandemia è d'evitar in collaps en ils ospitals. La situaziun en il Grischun mussa la suandanta grafica:

Stan da vaccinar

Decisiv per il cumbat cunter la pandemia è il dumber da persunas vaccinadas. I sa tracta da quotas en relaziun cun l'entira populaziun Svizra, pia incl. uffants pitschens.

Situaziun en Grischun

Las cifras da cas da corona per il Grischun publitgescha RTR sin basa da las indicaziuns sin la pagina d'internet dal chantun. Per pudair cumparegliar èsi da metter las cifras en relaziun. Savens vegn duvrà per quest intent il dumber pro 100'000 abitants. Per il Grischun na va quai betg, cunquai ch'i na dat gnanc tants abitants en las regiuns (en l'entir chantun vivan circa 200'000 persunas). Perquai publitgescha RTR las cifras pro 10'000 abitants:

Co che la pandemia è sa sviluppada en il Grischun dapi il cumenzament, mussa la suandanta grafica:

Testar, testar, testar

Il Grischun ha persequità si'atgna strategia da testar uschè bleras persunas sco pussaivel – saja en chasas da tgira, scolas u firmas. Qua la survista per l'entira Svizra:

Per giuditgar la situaziun epidemiologica gida la «rata da positivitad», quai vul dir: Quants dals tests che vegnan fatgs mussan in resultat positiv?

L'Organisaziun mundiala da sandad WHO scriva: Uschè ditg che la rata da 5% na vegn betg surpassada, pon ins quintar d'identifitgar tut ils cas da Covid-19. Sche questa limita vegn surpassada crescha il ristg che la pandemia daventa ord controlla. Era qua publitgescha RTR las datas per l'entira Svizra:

Cas activs, isolaziun e quarantina

Per chapir la situaziun e las graficas èsi bun d'enconuscher las definiziuns:

«En isolaziun» èn persunas testadas positiv e che ston exnum evitar mintga contact cun autras persunas. Qua cumenza lura era il «contact tracing», quai vul dir che emploiads dal chantun emprovan da chattar ora cun tgi che la persuna infectada ha gì contact.

Persunas «en quarantina» ubain «persunas da contact» numnan ins persunas che han gì contact cun ina persuna testada positiv sin il coronavirus e che sa chattan en quarantina ordinada ubain preventiva. Perquai èn questas cifras normalmain marcantamain pli autas che las cifras da persunas en isolaziun.

Cifras dals chantuns

La situaziun en ils chantuns po esser zunt differenta – quai ha il passà mussà. La tabella mussa las differenzas a maun da dus criteris:

  • L'incidenza da 7 dis metta en relaziun las infecziuns novas cun la populaziun. Concret: La summa da tut ils cas dals ultims 7 dis vegn calculada pro 100'000 abitantas ed abitants.
  • L’uschenumnada «Valur R» (valur da reproducziun) inditgescha quantas ulteriuras persunas ch’ina persuna positiva infectescha.

Detagls da las funtaunas

Avrir la box Serrar la box

Cifras d'infecziuns novas, ospitalisaziuns, mortoris, tests e vaccinaziuns derivan da l'Uffizi federal da sanadad BAG, il link avra en ina nova fanestra, ch'actualisescha quellas da glindesdi fin venderdi.

Cifras davart l'occupaziun sin staziuns intensivas rimna icumonitoring.ch, il link avra en ina nova fanestra, che vegn tgirà d'ina gruppa da perscrutaziun da la ETH.

La valur da reproducziun è ina stimaziun che deriva da la gruppa Theoretical Biology da la ETH, il link avra en ina nova fanestra e vegn publitgada cun in retard da 10 fin 17 dis.

Per visualisar las datas collavura RTR cun il team dad SRF Data.

Coronavirus

Avrir la box Serrar la box
Coronavirus

Dapli fatgs, infurmaziuns ed istorgias chattais qua.

RTR novitads 12:00

Artitgels legids il pli savens

Scrollar a sanestra Scrollar a dretga