Siglir tar il cuntegn

Header

video
Er il Grischun sto viver cun l’unda da la varianta omicron
Or da Telesguard dals 10.01.2022.
laschar ir
cuntegn

La regenza ha infurmà Nagins tests da manaschi pli en Grischun

Ils blers cas dad omicron fan vegnir als cunfins ils labors. Uss reagescha la regenza grischuna e limitescha il testar repetitiv a partir da damaun mardi sin las instituziuns da sanadad e da tgira, sin las scolinas sco er sin las emprimas e segundas classas primaras.

Il president da la regenza e minister d'economia Marcus Caduff manegia, che las emnas proximas daventan pretensiusas per las Grischunas ed ils Grischuns. Blers en il chantun vegnian en contact cun la nova varianta omicron, saja quai cun sa laschar vaccinar u cun s'infectar directamain cun il virus.

audio
Intervista Marcus Caduff: Po la regenza responsar quai?
04:55 min, Actualitad dals 11.01.2022.
laschar ir. Durada: 04:55 minutas.

Tenor Marcus Caduff èsi illusoric da vulair tegnair si l'unda dad omicron – quai saja ina realitad. Actualmain na vesa el dentant betg il basegn da prender mesiras pli rigurusas per il Grischun. Sche gea, lura fissi quai la chaussa dal Cussegl federal – ed er las cifras da las staziuns intensivas laschian il mument responsar da cuntinuar cun las restricziuns actualas.

Pli seriusa vegniss la situaziun, sch'interpresas relevantas per il sistem stuessan serrar.
Autur: Peter Peyer minister da sanadad

Fin uss han sulettamain singulas interpresas stuì serrar, pervi da blers cas da corona tar il persunal. En quest connex ha Peter Peyer discurrì d'ina sort lockdown fitg limità, sin dumonda d'in schurnalist. Sche la situaziun sa pegiureschia vinavant, stoppia la regenza dentant schon era discutar ulteriuras mesiras.

audio
Peter Peyer: Daco chalar cun la strategia da testar?
02:28 min, Actualitad dals 10.01.2022.
laschar ir. Durada: 02:28 minutas.

Damain tests da pool en il Grischun

Sco la regenza ha infurmà, na dattia a partir da mardi da mezdi nagins tests repetitivs en interpresas grischunas pli. En las scolas èn pertutgadas las classas davent da la terza ensi. La fin da schaner vegnia la situaziun lura evaluada da nov.

Tests repetitivs per pli paucs

Avrir la box Serrar la box
  • Nagins tests da pool porscha il chantun il mument per las interpresas grischunas.
  • En scolas datti sulettamain anc tests repetitivs per las emprimas e segundas scolas primaras. Vitiers vegnan las scolinas.
  • Ils tests repetitivs cuntinueschan en ospitals, clinicas, offertas per la tgira staziunara e la tgira da pazients stabels e da persunas attempadas. Lura era per la spitex, praticas da medis, praticas da dentists, praticas da fisioterapeuts, apotecas, chasas da dimora per persunas cun impediments, chasas da dimora per uffants e giuvenils, canortas e praschuns.

Omicron dat en il tact

Ils cas da corona creschan vinavant fermamain e bunamain adina sa tracti da la varianta omicron. Il temp da l'incubaziun saja cun trais dis enstagl da tsching dis pli curt tar omicron e quel saja er pli contagius. Actualmain sajan radund tschintg pertschient da la populaziun grischuna en quarantina u isolaziun, ha ditg Peter Peyer. E cun adina dapli provas positivas or dals tests da pool, hajan ils labors adina pli savens da far tests supplementars.

Cun las stretgas arrivian ils resultats ord ils labors pir 48 uras suenter il test u pli tard. Uschia perdia il testar repetitiv ses senn oriund, las chadainas d’infecziuns na possian betg pli vegnir interruttas. Las proximas emnas quinta la regenza numnadamain cun anc dapli persunas cun sintoms. Quai muntia lura anc dapli squitsch sin ils labors.

Tschertgar ulteriurs labors na porta nagut, en l'entira Svizra mancan capacitads.
Autur: Jon Domenic Parolini minister d'educaziun

Da testar vinavant ils pli pitschens, pia ils scolarins e scolaras e scolars da l'emprima e segunda classa – haja la regenza decis per proteger quels, ha agiuntà Jon Domenic Parolini. Senza vaccinaziun e mascrina sajan quels pli vulnerabels. Da l'autra vart prenda il chantun en cumpra d'avair damain controlla da la situaziun epidemiologica en las classas pli autas da las scolas grischunas. Areguard in'eventuala instrucziun a distanza per l'entir chantun ha il minister d'educaziun declerà envers RTR, ch'insatge uschia vegniss en dumonda sin il pli sche propi blers e bleras scolastas crudassan ora.

audio
Intervista Jon Domenic Parolini: Ristga il Grischun instrucziun a distanza?
04:07 min, Actualitad dals 11.01.2022.
laschar ir. Durada: 04:07 minutas.

Grischun suonda a l'Argovia

Il Grischun è stà il piunier da far ils tests da pool en las scolas ed en interpresas. Uss sforza la dinamica dad omicron da bandunar questa via, che saja tenor il president da la regenza Marcus Caduff stà in instrument efficient en il cumbat cunter il coronavirus. Il chantun Argovia è sa decidì per la medema via, e davent da glindesdi succedan ils tests repetitivs er sulet en las instituziuns da sanadad e da tgira.

RTR novitads 14:00

Artitgels legids il pli savens

Scrollar a sanestra Scrollar a dretga