En general chapescha l'Uniun grischuna d'artisanadi e mastergn la decisiun da midar la strategia. Sch'ils resultats dals tests arrivian pir suenter 2 fin 3 dis, lura na portian quels era nagut pli, ha ditg il directur da l'uniun Maurus Blumenthal envers RTR. Ils resultats stuessian arrivar suenter 24 fin 48 uras. Main cuntent sa mussa el cun il tempo da questa midada. Aifer fitg curt temp stoppian las fatschentas uss instradar las midadas, ed uschia di el ch'il temp saja «puspè ina giada memia curt». En in bun dumber d'interpresas fetschian ils tests da manaschis er part dal concept da protecziun. Uss stoppian ins adattar quests concepts.
Fa quarantina anc senn? Questa dumonda èsi uss da ponderar bain.
Il pli mal fetschia che persunas ch'èn en quarantina na possian uss betg pli far mintga dus dis in test, ed uschia sa deliberar da la quarantina. Questa pratica ch'era pussibla dapi la primavaira 2021 en il Grischun e che haja levgià fitg, crodia uss davent. Perquai propona Maurus Blumenthal l'idea da tests svelts che la glieud pudess far a chasa, senza ch'ils labors avessan dapli lavur.
