Siglir tar il cuntegn

Header

audio
Apotecas grischunas èn prontas, per far dapli tests da corona
Or da Actualitad dals 11.01.2022.
laschar ir. Durada: 2 minutas 36 Secundas.
cuntegn

Tests repetitivs Las apotecas quintan cun dapli persunas che vulan far in test

La regenza grischuna interrumpa ils tests da manaschis, damai ch’ils labors vegnan a lur cunfin. Uschia ston bleras collavuraturas e collavuraturs puspè guntgir sin las apotecas.

Cun ils tests repetitivs vegnan en il Grischun en media radund 30’000 tests da corona controllads dals labors. Damai ch’ils tests repetitivs vegnan ussa limitads sin scolinas, instituziuns da sanadad e tgira e sin l’emprima e segunda classa da la scola primara, ston puspè las apotecas grischunas surpigliar ina part da quests tests. Cuntrari als tests da spida da PCR ch’eran fin ussa en diever en ils manaschis e che ston vegnir evaluads en in labor, fan las apotecas ils tests sperts d’antigen. Tar quels survegn la persuna testada il resultat direct en apoteca. Quai è in levgiament per ils labors.

Buna preparaziun sco fundament

Actualmain sajan las apotecas vid s’organisar logisticamain, declera la presidenta da l’uniun d’apotecras e d'apotechers grischuns Monika Fehr. Vul dir: Empustar dapli tests d’antigen. Schebain ch’ella craja ch’i vegnia a dar puspè dapli clients e clientas, restia ella optimistica.

Nus vegnin era questa giada ad esser abels da vegnir a frida cun la situaziun.
Autur: Monika Fehr apotecra

Ils teams hajan dapi la pandemia adina dapli rutina, uschia ch’i na saja betg pli ina situaziun extraordinaria. Era cun ina mancanza da tests d'antigen na quinta Monika Fehr actualmain betg.

RTR actualitad 08:00

Artitgels legids il pli savens

Scrollar a sanestra Scrollar a dretga