La «clausula generala da polizia» lubescha d’agir excepziunalmain era senza basa legala. Ils criteris èn dentant fitg severs, sco per exempel stoi dar in privel direct per carstgauns ed i na dastga dar naginas mesiras alternativas. Concret: Sch’il luf s’avischina a pasturas u viandants pudess la regenza decider immediat da sajettar el, senza lubientscha da la Confederaziun. Quai vala dentant mo per lufs singuls e betg per entirs trieps.
Nagina opziun per triep dal Beverin
Sco Mario Cavigelli ha declerà envers RTR na vegnia quest agir dentant betg en dumonda per il triep dal Beverin. Là saja il chantun suandà a la pratica actuala ed haja plazzà quest’emna la dumonda a Berna, damai ch'i sa tractia da regular in entir triep. Tuttina ha el accentuà ch'ils schabetgs sin l'alp da la Muntogna da Schons sajan inacceptabels ed ina nova escalaziun.
Unic en Svizra
En Svizra fiss quai agir unic da sa basar sin la «clausula generala da polizia». Cusseglier guvernativ Mario Cavigelli è perquai cunscient ch’i dat anc bleras dumondas giuridicas ed er che quai daventa probabel in cas per las dretgiras.
178 animals stgarpads
Confermà quest nov agir ha Mario Cavigelli oz sin ina dumonda dal pur e giurist da Surava Reto Crameri (Allianza dal Center). Era auters deputads han fatg dumondas a la regenza en connex cun la stiaziun dal luf, ils custs per l'agricultura, la responsabladad etc.
Mario Cavigelli ha tranter auter era infurmà davart ils donns: Quest onn han ils lufs stgarpà 178 animals da niz en il Grischun (stan 19 d'avust), 173 nursas e 5 chauras. Plinavant han ils lufs blessà animals, numnadamain 3 asens, 4 sterlas, 1 vatga, 16 nursas e 2 chauras.