Tar la visita en il local dal sozialwerk.lgbt la dumengia suentermezdi, pon ins natiralmain vesair bleras fatschas rientas. Ma era sch’il cler resultat fa plaschair audan ins en il discurs cun las persunas omosexualas, ch’ellas vesan tuttina anc bleras sfidas e puncts che ston tenor els sa meglierar.
Per exempel saja ina part da la societad anc betg da l’opiniun, che uffants possian crescher si bain era tar in pèr omosexual, di ina giuvna da 20 onns. Ella haja dentant vesì sezza, ch’i saja era betg ideal da crescher si en ina lètg tranter um e dunna, sche questa na funcziunia betg. En general dovria quai anc blera lavur enfin che pèrs omosexuals vegnian acceptads dal tut da la societad. Ella spera, ch’il cler resultat da votaziun saja in agid persuenter.
Potenzial dettia anc en blers lieus – era tar ils meds da scola
Tar fitg differents temas saja anc necessari da meglierar la situaziun, di Cécile Weber, la suprastanta dal sozialwerk.lgbt. Tranter auter giavischa ella, ch’era ils meds d’instrucziun vegnian adattads e ch’ils pèrs omosexuals vegnian resguardads là, per exempel tar quints da text. In auter punct impurtant ch’ins stoppia lavurar vidlonder è tenor ella l’acceptanza dad autras culturas en nossa societad. Dad ina vart stoppian els vegnir activs e pledentar questas parts da la societad. Da l’autra vart stoppian els dentant er avair il sustegn da las vischnancas. Uschia pudessan els per exempel far part ad inscunters che vegnan organisads per las persunas indigenas e las persunas dal ester.
