Suenter 5 onns vul il chantun far in'ulteriura analisa davart la situaziun da las vischnancas fusiunadas en il Grischun. En la «Controlla da las fusiuns II» examinescha il chantun, ensemen cun la Scol'auta spezialisada dal Grischun, per la segunda giada las 27 fusiuns da vischnancas, ch'eran vegnidas examinadas il 2017 en la «Controlla da las fusiuns I». Vitiers vegnian era 7 ulteriuras vischnancas che han fusiunà durant ils ultims tschintg onns. Uschia vul il chantun analisar l'effect a media fin a lunga vista da las fusiuns da vischnancas. La populaziun da las vischnancas pertutgadas dastgian sa participar activamain a l'enquista, uschia communitgescha il chantun.
Ils ultims onns sajan las structuras communalas en il Grischun stadas fermamain en moviment. Las numerusas fusiuns da vischnancas han gì per consequenza ch’il dumber da vischnancas grischunas è sa reducì ils ultims 25 onns da 212 sin 101.
