Els hajan actualmain cas positivs en 10 fin 12 da las 180 classas cun passa 3'000 scolaras e scolars, uschia Patrick Degiacomi, il manader da l'Uffizi da furmaziun, societad e cultura da la citad da Cuira. Quai saja anc da dumagnar, ma il dumber da cas creschia ed uschia era la lavur per las scolas. Il pli problematic saja, sch'i detti plirs tests positivs in suenter l'auter en il medem lieu. Quai saja fin uss stà il cas be en singuls dals 14 lieus d'instrucziun e là sajan ins era gia al cunfin cun las capacitads. Perquai ch'i saja en auters lieus però stà ruassaivel cun nagins cas positivs sur pliras emnas, hajan ins pudì cumpensar quai. Sch'i dettia però dapli cumulaziuns da cas, lura na dumognian ins betg pli quai senza ulteriuras mesiras. Quellas èn tenor Patrick Degiacomi lura da discutar cun l'Uffizi da sanadad dal chantun.
Il mument dumagnain nus anc, ma sch'il dumber da cas crescha vinavant uschia, vegnin nus als cunfins e stuain guardar cun l'uffizi da sanadad tge mesiras pigliar.
En singuls lieus gia mesiras pli severas
Là nua che blers uffants s'entaupian adina puspè u nua ch'i dettia savens ina maschaida pervi da midada da roms etc., hajan els gia piglià mesiras supplementaras. Uschia haja p.ex. in stgalim superiur gia in obligatori da mascrina. En in auter lieu hajan ins introducì temporarmain che betg tuts giajan communablamain a pausa. E puspè insanua auter vegnian singulas classas instruidas sin distanza. En general na vala però per la gronda part da las scolaras ed ils scolars sco era per las persunas d'instrucziun a Cuira nagin obligatori da mascrina auter che en situaziuns nua ch'i na giaja betg da tegnair en la distanza.
... i vegn pli e pli stretg.
En las proximas emnas vegnian els ad installar apparats da mesirar la concentraziun da CO2 en tut las stanzas da scola. Ulteriuras mesiras vulessan las scolas da Cuira però be introducir sche quellas fan da basegn er ord vista da l'Uffizi da sanadad dal chantun. Els sajan da l'avis che tant las purschidas en scola sco er en il temp liber duajan vegnir restrenschidas uschè pauc sco pussaivel, uschia Patrick Degiacomi. En vista a l'enviern che stat avant porta, quinta el er ord las experientschas fatgas ch'i possia bain anc vegnir in zic pli precar tut. Ma el spera ch'i reusseschia da rumper questa unda e ch'i na saja betg necessari dad anc ina giada far instrucziun sin distanza per tuts. E quai betg mo perquai che adina dapli uffants han corona, er scolastas e scolasts ston adina puspè vegnir remplazzads perquai ch'els u ellas ston ir en quarantina u en isolaziun.
Instrucziun da preschientscha è l'emprima prioritad
Actualmain creschan ils cas da corona cunzunt tar uffants e giuvenils. En il Grischun èn quai il mument tranter 100 e 200 novs cas positivs per emna sin passa 18'000 uffants en la scola populara. Cunzunt il Grischun dal nord e la Val dal Rain èn ferm pertutgads. Uschè ferm che l'uffizi da sanadad haja gia fatg propostas per mesiras a l'uffizi d'educaziun e la regenza, ha ditg il minister d'educaziun Jon Domenic Parolini. Tgeninas che pudessen ir en vigur n'ha el anc betg pudì dir. Quai saja il mument anc en discussiun. Ma i saja da quintar proximamain cun decisiuns.
La finamira centrala tar tut las mesiras e decisiuns saja però da pudair instruir vinavant en scola. Las experientschas da l'ultima fasa d'instrucziun sin distanza hajan mussà che blers uffants hajan patì sut questa situaziun. Quai valia d'evitar.
La pli auta prioritad ha l'instrucziun da preschientscha. E nus lain pigliar tut las autras mesiras necessarias per evitar ch'ins stoppia puspè trametter ils uffants a chasa e far instrucziun sin distanza.
Strategia da testar sa cumprovia
Il process actual saja uschia che l'uffizi da sanadad persequiteschia attentamain ils svilups. Tut tenor basegn fetschia quel lura propostas per mauns da la regenza per decider. En quest connex sa cumprovia la strategia da testar en las scolas, ha ditg Jon Domenic Parolini. Uschia vesian ins svelt, er pli svelt ch'en chantuns che na fetschian nagins tests regulars nua ch'i dettia cas. Perquai possian ins era reagir svelt e punctuà, là nua ch'i fetschia da basegn.
Quai cunvegn. Er sch'i custa ina massa da far ils tests. Quai è ina mesira preventiva fitg impurtanta. E forsa èsi era d'intensivar quella.
I saja bain char da testar cuntinuadamain, ma quai sa cumprovia gist en questa situaziun. Quai saja ina mesira preventiva fitg impurtanta. Actualmain fan las scolas ils tests mintga mesemna. Tenor il minister d'educaziun valissi però la ponderaziun da tut tenor augmentar la cadenza da tests.
