En pliras regiuns grischunas crescha il dumber dad infecziuns novas a moda sumeglianta sco avant in onn, pia cura che la segunda unda è vegnida. Actualmain sa chattian circa tuttina bleras persunas en isolaziun. Lura n’haja però anc dà nagins tests en scolas e manaschis ... sco er nagina vaccinaziun, scriva l’Uffizi da sanadad dal Grischun vinavant. Suenter las regiuns Partenz e Landquart sa derasa l’unda da corona actuala cunzunt en las regiuns Plaun, Plessur, Viamala, Alvra ed Engiadina Bassa cun la Val Müstair.
Actualmain sa chattan en Grischun 686 persunas en isolaziun e 1'009 en quarantina. Glindesdi ha il Grischun annunzià 44 infecziuns novas aifer in di. 19 persunas sa chattan en ospitals grischuns e 5 da quellas èn sin la staziun intensiva.
En l'entira Svizra ha l'Uffizi per sanadad registrà 6'649 infecziuns novas en il decurs da 72 uras. Cun quai è la media da set dis creschida per 48% cumpareglià cun la media da l'emna passada. Il medem temp ha il BAG era registrà 9 cas mortals e 53 assegnaziuns en ospitals. La quota da positivitad è era creschida. En la media da set dis èsi 9,8% da tut ils tests che resultan positiv sin corona. Uschia è la quota creschida aifer in'emna per radund dus puncts procentuals.
