A Cuira è la quota d'assistenza sociala tar 3,1%, 0,2% pli aut che l'onn avant. Quai saja ina da las pli bassas quotas da las 14 citads analisadas, scriva la citad vinavant. Fitg positiv saja era che la quota da dischoccupaziun saja fitg bassa cun 1,8%.
Il dumber d'abitants ed abitantas a Cuira è creschì 2020 per 1,7%, il dumber da cas socials dentant per 4,8%. Il dumber da persunas cun sustegn schizunt per 7,8%. Quai mussa che bleras famiglias èn pertutgadas. In grond ristg da basegn d'assistenza sociala han geniturs ch'educheschan persuls lur uffants. Surtut pertutgadas èn dunnas persulas cun uffants minorents. Dapli ch'in quart dals tegnairchasas cun persunas ch'educeschan persul, survegnan agid social. Era persunas tranter 36 e 45 onns, sco era persunas da l'exteriur èn spezialmain pertutgadas.
Tenor la Citad da Cuira saja la situaziun gia puspè sa quietada. Il settember 2021 hajan ins gì 600 cas d'agid social cumpareglià cun 602 cas il settember 2019.
In fenomen fitg derasà è che persunas che sa distatgan da l'agid social han in grond risico da puspè duvrar sustegn, perquai che gia in quint nunspetgà dal dentist possia esser damemia. Il post da la societad da la Citad da Cuira focussescha perquai vinavant sin la promoziun ed il sustegn da la tgira d'uffants e la scolaziun da persunas che retschaivan assistenza sociala.