L’emprima dunna sco directura da questa organisaziun è cuntenta cun il prestà sco directura da Cuira turissem.
I è stà 10 fitg bels ed interessants onns cun blers buns projects e products.
Ils highlights sajan segir ses team, las guidas atras la citad ed il premi da valur stads, di Leonie Liesch. Uss banduna ella l'organisaziun e surprenda «Graubünden Viva» e sa fatschenta là cun la culinarica dal Grischun.
In sguard enavant
Cuira turissem saja vid sa revegnir bain da la pandemia. Puspè tuttina blers giasts a Cuira ed uschè bleras reservaziuns per las guidas atras la citad sco anc mai da quest temp, presenta Leonie Liesch durant la radunanza generala.
Tuttina spetgian differentas sfidas sin il nov directur, Marc-Andrea Barandun, e la nova suprastanza. Tranter auter il ferm franc svizzer, dumondas finanzialas, la strategia da Cuira turissem e nua ch’els vesan l’organisaziun en il futur sco era las bleras midadas internas. Quai sajan uss tut chaussas che la nova suprastanza ed il nov directur hajan da concretisar.
Nova suprastanza per Cuira Turissem
Cuira Turissem ha da nov in co-presidi. A chaschun da la radunanza generala da glindesdi saira èn vegnids elegids Jon Andrea Schocher e Sandra Adank. Els eran gia commembers da la suprastanza: Schocher era responsabel per il sectur strategia e perscrutaziun ed Adank per il sectur commerzi e mastergn. Els veglian ussa reunir lur cumpetenzas. Sia fermezza saja l'analitica ed el vegni a s’occupar pli fitg cun las collavuraturas ed ils collavuraturs.
Uschia pudain nus far ensemen in ideal co-presidi e profitar da las fermezzas da tschel.
La presidenta d'enfin ussa, Vera Stiffler ha demissiunà suenter esser stada passa diesch onns en suprastanza e suenter dus onns sco presidenta.
Autras elecziuns
Per il vice-president Kurt Künzli succeda Jago Leyssens. Il nov vice-president è, sco gia Kurt Künzli, activ en la sparta da gastronomia e hotellaria. Tranter auter sco directur dal hotel ABC a Cuira ed expert a la scola da hotellaria a Passugg. Leyssens succeda a Kurt Künzli che ha demissiunà suenter esser stà 22 onns en uffizi.
Era il sez dal u da la represchentanta da la citad da Cuira è vegnids liber. Quel occupa uss Victor Zindel. El è manager da la regiun Plessur e president da la scola da musica Landquart e conturn.
Pir dacurt ha Cuira Turissem era elegì in nov directur:
