La nova e fitg contagiusa varianta dal coronavirus, omicron, na fa betg mo quitads als responsabels en ils ospitals. Era ils teams da contact tracing en divers chantuns sa preparan per l'unda cun – tenor la taskeforce da la Confedraziun – fin a 20'000 cas novs per di durant il schaner.
Sco il schef dal stab directiv chantunal, Martin Bühler ha ditg envers SRF, dettian ins cun il team actual da 30 persunas dumogn a fin a 500 cas. Sch'i dettia però dapli cas per di, lura stoppian els crescher. Ed insacura cuntanschian ins in cunfin, uschia Bühler vinavant. Actualmain è il chantun londervi da bajegiar si l'infrastructura per 30 ulteriuras persunas.
Er il chantun da Turitg sa prepara
En il chantun da Turitg tractan ils contact-tracers actualmain bunamain 2'000 cas per di. Quai sajan uschè blers sco anc mai ed els haja era tanta glieud sco anc mai, uschia Beat Lauper, il responsabel per il contact tracing en il chantun da Turitg. Ed i saja mintga di, constantamain blers cas positivs e persunas da contact.
Tar las actualmain 120 plazzas da lavur duain 45 ulteriuras vegnir vitiers. Anc saja tut sut controlla ma il responsabel Beat Lauper quinta cun massivamain dapli cas ed uschia era lavur per ses team.
