L'accumpagnader da tren
Luzi Oberer lavura dapi 35 onns tar la Viafier Retica. El ha fatg là l’emprendissadi e lavura er uss cun 51 onns anc per la viafier. Sco accumpagnader da tren è Luzi Oberer fitg savens en gir, oz da San Murezzan fin a Tirano. Ses plaz saja davosvart en il tren tar ils passagiers e las passagieras. El ama il contact cun la glieud, ils discurs e las impressiuns fitg differentas sin ils trajects.
Il locomotivist
Pli u main tut sia vita lavura Curdin Bisaz per la Viafier Retica. Sco emprim ha el fatg in giarsunadi e dapi 10 onns lavura el sco locomotivist. Schon sco mattet ha el ditg ch'el veglia ir tar la viafier. En ses biro, co Curdin Bisaz numna la locomotiva, sa senta el bain, el giauda dad esser en gir ed esser per sasez.
Il bel è dad esser en gir e guardar la cuntrada.
En la locomotiva ha el in iPad cun si diversas infurmaziuns, per exempel l'urari, il retard u il plan da lavur. Cun in regulatur po Curdin Bisaz partir, dar gas u franar. Cun auters nufs po el dar liber las portas u reglar la glisch u la temperaturas en ils vaguns. Sur il func vegn el tranteren infurmà da Landquart sch'i dat midaments da binaris u uschiglio infurmaziuns administrativas.
Il pli gugent vom jau en la Surselva u tras l’Alvra, quai èn ils trajects ils pli bels.
Or da l'archiv:
Ils 19 da favrer 2022 ha la Viafier retica transportà 4’225 vehichels tras il tunnel dal Vereina – in di da record.
