Siglir tar il cuntegn

Header

cuntegn

Cussegl grond Allianza dal Center perda sezs, resta però la ferma partida

L’Allianza dal Center cementescha sia posiziun en il Grischun: Sper la maioritad en la regenza resta ella er en il Cussegl grond la ferma partida. Malgrà che l'AdC perda mandats entras il nov sistem d’eleger, il proporz dubel, vegn ella tuttina anc sin 34 sezs en il parlament. La superpussanza ch'ella aveva il 2018 cun 53 da 120 sezs è però istorgia. Tge che dat en egl, ella ha uss duas pussaivladads per vegnir sin ina maiortad absoluta. Sch’ella sa collia cun la PLD datti 61 vuschs e sch’ella sa collia cun la PS sa resultan era 61 vuschs. Quai munta en la pratica: Tut tenor tema po l’Allianza decider da collavurar cun ils burgais ubain cun la sanestra.

Tar ils perdiders avevan ins era quintà la PLD – ella na perda dentant betg tant sco spetgà. Entant profiteschan las partidas da pol dal proporz: Il pli grond sigl fa la PPS en il Cussegl grond, da 9 sin 25 persunas. Era la PS augmenta ses dumber. La Partida verd-liberala surpassa cun set persunas la finamira da vegnir sin ina fracziun en il Cussegl grond, necessari fissan stadas tschintg.

Allianza dal Center relativescha, ils pols èn pli u main cuntents

Malgrà ch'ins perda ils blers sezs, resta l'Allianza dal Center la ferma partida en il Cussegl grond. Il president da partida Kevin Brunold è cuntent cun il resultat, co el ha ditg en la runda d'elefants dad RTR. Brunold è dentant er pertschert ch'i dovra uss dapli allianzas en il parlament per far politica. Qua vesa er il president dals liberaldemocrats Bruno Claus ina schanza: en il futur stoppian las partidas collavurar pli fitg ina cun l'autra, uss che gist trais partidas, numnadamain la PS, la Partida populara ed ils liberaldemocrats vegnan sin bunamein tuttina blers sezs. I vegnia el futur segir a dar interessantas discussiuns en il Cussegl grond.

Il president da la PS, Andri Perl, sa legra ch'il parlament è vegnì in zic pli sanesters e che la PS e la Verda han fatg tantas vuschs – ch'i dettia uss entras las pli fermas partidas da pol frontas pli diras en il parlament na tema el betg: en il Grischun regia numnadamain tenor el ina buna cultura da politica. Er la PPS dat en la medema crenna. Malgrà ch'ins n'haja nagin sez en la regenza, vegnia la partida uss betg ad ir en l'opposiziun totala, uschia il president ad interim – Thomas Gort. Cler ch'ins vegnia a far politica d'opposiziun tar singuls temas. En general stettia la partida, sco gia ils ultims quatter onns, per politica pragmatica.

Resultats en ils singuls circuls electorals

Ils resultats dals singuls circuls electorals procuran per inqual surpraisa. Tranter auter ha il nov sistem electoral giu ina gronda influenza, uschia per exempel en la Cadi nua ch'il president da la Lia Rumantscha, Diego Deplazes n'è betg vegnì reelegì. Dentant er a Cuira è per exempel il president da fracziun dals socialdemocrats Lukas Horrer daventa unfrenda dal proporz. Dentant er en auters cirquits hai dà intginas roschadas – la survista dad RTR:

Ils resultats da tut las candidatas e candidats

Quantas vuschs che mintga candidata e candidat ha survegnì, tgi ch'è elegì u betg elegì ed ils resultats detagliads dals singuls circuls pudais Vus guardar en la tschertga da RTR.

Funtauna elecziuns grischunas

Avrir la box Serrar la box

RTR sa basa sin las datas che la Chanzlia chantunala dal Grischun metta a disposiziun. Quellas èn da chattar qua.

RTR elecziuns

Artitgels legids il pli savens