Sco Diego Deplazes ha ditg a RTR na saja quai betg ina surpraisa che la Lia na fetschia betg part activamain da quest'emna. Organisà saja quai dal departament da Ignazio Cassis ch'ha instradà quest'emna l'onn passà. Finamira èsi da far visibel la lingua e da far cler ch'i na dat betg be trais linguas en Svizra mabain quatter. E quai er en l'exteriur. Perquai collavuran er las ambassadas tar quest emna. Er auters pajais possian emprender da la situaziun en Svizra e co i vegn collavurà.
Qua sut pudais vus tadlar il discurs cun Diego Deplazes:
I fetschia quitads sche gia ils giuvens e las giuvnas fan quitads per la lingua. Dentant possian nus tuttas e tuts er far insatge encunter. En emprima lingia cun duvrar il linguatg.
Nus tuts stuain guardar che noss bel linguatg vegnia mantegnì – e quai cun duvrar el en il mintgadi ed uschè savens sco pussibel e dapertut e tar mintga occurrenza e chaschun.
En in segund pass haja quai er in ferm effect da s'engaschar tar la politica per il linguatg. La Lia Rumantscha emprova adina puspè sin tut ils secturs, pia per exempel er tar grossists, da duvrar la lingua. I saja da mussar si l'avantatg da duvrar la lingua rumantscha. La Lia Rumantscha è vid crear in'iniziativa per ch'ins possia cun agid dad in QR-code tadlar per exempel la glista d'ingredienzas per rumantsch.
Nus na cuntanschain mai l'entira populaziun. Nus cuntanschain adina ina part e nus vulain sur tut cuntanscher quella part che ha l'affinitad e che schazegia er quai.
