Siglir tar il cuntegn

Header

audio
Il derschader Orlando Zegg ha lavurà correct, ha decidì la dretgira regiunala Partenz
Or da Actualitad dals 17.09.2021.
laschar ir. Durada: 5 minutas 27 Secundas.
cuntegn

Dretgira regiunala Partenz Orlando Zegg n'ha betg commess abus d’uffizi

I saja stà in cas extraordinari, ha la derschadra Patrizia Winkler-Rentsch ditg il venderdi avantmezdi, cura ch'ella ha preschentà il verdict da la Dretgira regiunala Partenz. Tant pli sajan els sa fatschentads a moda minuziusa cun il cas.

La renfatscha dal procuratur public che Orlando Zegg haja commess abus d'uffizi cun decretar il november 2017 in'acziun da polizia – na saja betg sa verifitgada, ha ditg la derschadra. Per ademplir il delict d'abus d'uffizi stoppia in derschader s'allontanar dal dretg e da las leschas. Quai n'haja Orlando Zegg betg fatg, cura ch'el haja tramess la polizia tar la chasa da Adam Quadroni – per procurar che la dunna da Quadroni possia prender cun ella rauba dals uffants.

I dettia differentas vistas giuridicas e differentas praticas areguard la cumpetenza da relaschs superprovisorics. Orlando Zegg na saja en ses agir betg svià a moda pesanta da dretg e lescha, cura ch'el haja decretà il relasch superprovisoric. Il derschader da l'Engiadina Bassa Val Müstair saja stà persvadì dad esser cumpetent. Ed el saja era stà persvadì ch'el ageschia a favur dal bainstar dals uffants dad Adam Quadroni, uschia la derschadra dal Partenz e Tavau.

video
Orlando Zegg, il president da dretgira da l’Engiadina Bassa è nunculpant
Or da Telesguard dals 17.09.2021.
laschar ir. Durada: 2 minutas 9 Secundas.

Pass tar instanza superiura anc avert

Sch'il cas vegn tratg vinavant a la Dretgira chantunala, n'è fin uss anc betg enconuschent. Il procuratur public aveva pretendì mo in chasti plitost miaivel per Orlando Zegg, numnadamain in chasti en daner cundiziunà da 60 schurnadas à 260 francs ed ina multa da 3'500 francs.

La dretgira regiunala Partenz ha giuditgà il cas cun ina chombra da trais derschaders davart. La derschadra Patrizia Winkler-Rentsch è giurista. Tar ils dus auters derschaders sa tracti da laics.

audio
Per tadlar curt e cumpact
ord RTR Audio dals 17.09.2021.
laschar ir. Durada: 1 minuta 41 Secundas.

RTR novitads 17:00

Artitgels legids il pli savens