Siglir tar il cuntegn

Header

cuntegn

Economia e turissem Guerra derasa malsegirezza en il Grischun

Interpresas turisticas ed economicas en il Grischun badan l’augment dal pretsch per ieli mineral ed il ferm franc svizzer. Per mesiras saja quai per gronda part anc memia baud, ma la malsegirezza è preschenta.

Entras las sancziuns che la Svizra ha surprendì da l’Uniun europeica è s'augmentà il pretsch per ieli mineral fermamain. Quai percorschan er interpresas en il Grischun. La Ems Chemie quinta ch'ella stoppia auzar ils pretschs, sch'ils pretschs da materia prima van vinavant ad aut, ha ditg la scheffa Magdalena Martullo. L'Ems ha er dus lieus da producziun en la Russia. Enfin uss funcziunian quels anc magari normal.

Curt avant l’entschatta da la stagiun da construcziun, fa er l’Uniun grischuna dals impressaris quint cun custs pli auts. Tenor Andreas Felix, il manader da l’uniun, na badan els enfin ussa dentant betg anc grondas differenzas e na ston betg adattar insatge. En la branscha hajan ins vinavant blera lavur.

L'occupaziun da noss persunal per questa stagiun è positiva.
Autur: Andreas Felix Manader da l'Uniun grischuna dals impressaris
audio
Consequenzas per economia e turissem en il Grischun
ord Actualitad dals 16.03.2022.
laschar ir. Durada: 2 minutas 47 Secundas.

Ferm franc svizzer

Dapi l’onn 2015, cura ch'il curs minimal da l'euro è vegnì annullà, n'è il franc svizzer betg pli stà uschè ferm sco ussa. Il franc svizzer è actualmain tuttina sco l'euro. Franz Sepp Caluori, il president da Gastro Grischun, na vesa betg grondas sfidas, er sche products e servetschs en Svizra daventan pli chars.

Nus avain adina en egl la situaziun e reagin cura ch'igl è uschenavant.
Autur: Franz Sepp Caluori President da Gastro Grischun

Per giasts da pli lunsch davent haja la guerra lieu en Europa, e pudess perquai starmentar. Ils cunfins na sajan en quest reguard betg uschè clers, manegia Caluori. Perquai sa concentreschan ils manaschis da gastronomia sin ils giasts da l’Europa e da la Svizra.

Credit Suisse: Guerra fraina la conjunctura

La guerra en l'Ucraina na vegnia pli probabel betg ad avair in effect memia ferm sin la creschientscha economica en la Svizra dentant dar schlantsch a la chareschia – quai è la valitaziun da la banca gronda Credit Suisse. Ella quinta da nov cun ina inflaziun dad 1,8% enstagl 1%. Surtut perquai ch'ils pretschs d'energia s'augmentan.

La guerra en l'Ucraina fraina bain la conjunctura ma il restabiliment suenter la pandemia da corona predomineschia quest effect negativ. Perquai quintan ils economs da la Credit Suisse anc adina cun ina creschientscha economica da 2,5% l'onn current.

RTR actualitad 07:00

Artitgels legids il pli savens

Scrollar a sanestra Scrollar a dretga