Siglir tar il cuntegn

Header

audio
Handlettering sco trend
Or da Actualitad dals 21.12.2021.
laschar ir. Durada: 2 minutas 47 Secundas.
cuntegn

En moda Scriver a maun è (puspè) trendy

En noss temp digital è il «Handlettering» puspè en moda. I na sa tracta dentant betg mo dal scriver, mabain dal far dissegns cun pleds.

Blers manegian che «Handlettering» saja simplamain il pled modernisà per calligrafia. Ma quai n‘è insumma betg ils cas. Il «Handlettering» cumbinescha bleras differentas scrittiras, e la fin vegnian creads dissegns cun pleds. Quai ha ditg la manadra da curs da scriver a maun Dania Beer.

Dania Beer è oriunda da la Val Medel e dat curs da «Handlettering». Ella ch'ha sezza era emprendì quai en in curs, punctuescha però ch'in curs sco tal na tanschia betg. Be cun exercitar e bler disciplina vegnian ils resultats adina megliers, tge che motiveschia lura er da far vinavant. Mintgina e mintgin possia emprender «Handlettering», era sch'ins n'haja anc betg propi ina bella scrittira. Tut quai ch'i dovria saja: interess ed in pau creativitad.

Jau sezza n'hai insumma betg ina bella scrittira. Mintgatant na poss jau betg leger quai ch'jau hai scrit. Jau n'hai era mai dissegnà gugent. E tuttina hai jau pudì emprender il Handlettering.
Autur: Dania Beer menadra da curs per «Handlettering»

Ils curs da scriver èn fitg populars. Persunas en mintga vegliadetgna vulan emprender – la gronda part è dunnas.

Sco puspè en scola – però betg sco en scola

En ils curs pon ellas empruvar ora il material, sco per exempel ils fieuters spezials – ils «Brushpens». Sumegliant sco en scola, scrivian las participantas ed ils participants lingias cun bustabs e pleds – e quai en differentas scrittiras. Quest exercizi saja impurtant per vegnir davent da la scrittira da scola. Il «Handlettering» è pli liber. I na dettia naginas reglas. Ins po far gist sco ins ha gust. La devisa è: empruvar, far ed exercitar.

Il desideri da far insatge a maun

En in temp che la digitalisaziun ha conquistà noss mintgadi è il desideri da far insatge a maun puspè qua. Per cumenzar cun il «Handlettering» na dovri betg bler material. Malgrà ch'i dat ina massa material da cumprar han ins gia tut il necessari a chasa.

Tut quai ch'ins dovra per cumenzar cun Handlettering han ins a chasa: il palpiri, in rispli ed ina gumma.
Autur: Dania Beer menadra da curs per «Handlettering»
audio
Tips e trics cun Dania Beer
ord Actualitad dals 21.12.2021.
laschar ir. Durada: 2 minutas 44 Secundas.

Tgi che vul empruvar il «Handlettering» e dovra ideas ed inspiraziun chatta quellas dapertut: En cudeschs e sin paginas da l'internet datti numerus exempels, tips e trics. Mintgatant possian ins schizunt sa perder en tut l'inspiraziun ed emblidia da scriver, crear e far sez. Ina finamira che blers han è da prender temp d'esser creativ. Per exempel da reservar mintga saira ina mes'ura per scriver.  

Gist en il mintgadi da la lavur u famiglia ch'ins ha ina massa da far, vali fitg bler da prender temp per sasez.
Autur: Dania Beer manadra da curs per «Handlettering»

RTR actualitad 07:00

Artitgels legids il pli savens

Scrollar a sanestra Scrollar a dretga