Il chantun Grischun ha acceptà enfin uss duas dumondas per sustegn finanzial en cas ch’occurrenzas grondas n’avessan betg lieu pervia da corona. Quai èn las cursas da la cuppa mundiala da mountainbike a Lai ed il Classic Car ad Arosa (omaduas occurrenzas han lieu il cumenzament settember). Quai ha declerà il minister d’economia Marcus Caduff en il Cussegl grond.
En tut ha il chantun survegnì otg dumondas per sustegn. Gia cler è ch’il Club da hockey da Tavau (campiunadi a partir dals 7 da settember) ed il maraton da skis da l’Engiadina (13 da mars 2022) vegnan era a s’annunziar per questa furma da garanzias.
50:50 tranter Confederaziun e chantuns
Quest sistem da garanzia ha il Cussegl federal decis il matg, damai ch’igl è causa corona extrem intschert da planisar events. Ils custs partan Confederaziun e chantuns mintgamai.
Il chantun Grischun haja reservà per quest onn 5 milliuns e per l'onn che vegn 4 milliuns francs, uschia Marcus Caduff. Ina mesadad paja dentant sco menziunà la Confederaziun. Quants da quests daners ch'il chantun stoppia lura propi pajar, saja quasi nunpussaivel da dir actualmain.
