-
Bild 1 von 3. Ils sulet café a Stussavgia è il lieu d'entupada dils lavurers che van ad in café a las nov. Bildquelle: RTR, Gierina Gabriel.
-
Bild 2 von 3. Dapi otg onns maina Edith Boner il «z'cafi» a Stussavgia. Bildquelle: RTR, Gierina Gabriel.
-
Bild 3 von 3. Era turists anflan savens la via en il café che giascha gist sper la staziun d'auto da posta. Bildquelle: RTR, Gierina Gabriel.
Nagina ustaria, enstagl il «z'cafi»
Il café gist sper la staziun da l'auto da posta è pitschen – be in per maisas e sutgas. La tavlegiada e las mobiglias èn da lenn, uschia ch'ins sa senta bunamain in zic sco en ina stiva. I saja bain in lieu d'entupada, declera l'ustiera Edith Boner. Dapi otg onns maina ella il café. «Oravant tut ils lavurers vegnan da las nov a baiver in café. Els èn mia clientella principala», explitgescha ella.
L'unica ustaria a Stussavgia – il «Rathaus» – è stada serrada ina giada per dus onns. Lura è l'ustaria vegnida averta ed actualmain è ella puspè serrada. Quai saja fitg donn, manegia l'ustiera dal «z'cafi». «En il «Rathaus» aveva la glieud er la pussaivladad da magliar. Jau hai vairamain be in café. Quel serra sur mezdi e la saira las sis.» Il café marschia en general bain. Segir dettia bler temp ch'ella saja tut suletta e haja nagins giasts. «Uss durant la stad è la stagiun auta. Lura marscha adina insatge.» Viver dal «z'cafi» po Edith Boner dentant betg. «Jau fatsch quai plitost per plaschair. Emprendì hai jau pastiziera. D'avair in agen café era adina mes siemi.»
Nagina stizun, enstagl la «Spensa»
Gist vis-a-vis dal «z'cafi» è era la stizun cun il num «Spensa». Tala funcziunescha tenor il principi da self-service. Varga 50 producents da la Val Stussavgia exponan lur products. Ina giada è la «Spensa» ensemen cun la mazlaria stada nominada per il Prix Montaigne.
-
Bild 1 von 3. Chaschiel, products da latg e charn èn il products principals da la Spensa. Bildquelle: RTR, Gierina Gabriel.
-
Bild 2 von 3. Bain frequentada e bunamain premiada. La Spensa era nominada per il Prix Montagne. Bildquelle: RTR, Gierina Gabriel.
-
Bild 3 von 3. Varga 50 producents locals pon exponer lur products. Bildquelle: RTR, Gierina Gabriel.
Naginas vatgas, enstagl chamels, lamas e yaks
Tgi che passa l'emprima giada tras il vitg da Stussavgia sto forsa guardar duas giadas: sin las pastiras pasculeschan numnadamain betg mo vatgas, mabain er animals pli exotics sco chamels. Angelika ed Erwin Bandli fan il pur a Stussavgia e tegnan dus chamels, lamas e yaks – ma naginas vatgas.
Aladin e Mulan – ils dus chamels – nov lamas e 34 yaks tutgan ad Angelika ed Erwin Bandli. Emprendì han els atgnamain autras clamadas ed els fan pir dapi 18 onns il pur. Cura ch'els sajan sa decidids d'avair famiglia, hajan els lura surprendì il puresser dals geniturs dad Erwin, declera Angelika Bandli. «Avant essan nus viagiads enturn durant 20 onns en l'entir mund. Sche nus ans domiciliain a Stussavgia, lura prendain nus simplamain il mund tar nus a chasa, avain nus pensà.» Quai saja il motiv daco ch'els tegnian plitost animals exotics.
Nossa finamira è da laschar sentir il giast il silenzi da quest lieu e la ruassaivladad dals animals.
Dasper far il pur porschan ils Bandlis era turas da viandar cun lamas. Maximalmain sis giasts fan part d'in trekking e mintgin survegn in lama. «I va perquai che nus vulain mussar co ins communitgescha cun in animal, sch'ins na po betg duvrar pleds.» Cun sellas spezialas portan ils lamas la bagascha dals viandants. Pernottà vegn en ina jurta.
Ins pudess crair ch'els pateschian dal fraid durant l'enviern. Tenor Angelika Bandli ston ins dentant differenziar: «Ils chamels cun dus bots vegnan or dal desert fraid e tals cun in bot dal desert chaud.» Lur chamels sajan da quels cun dus bots che sa sentian bain durant l'enviern a Stussavgia. La stad dentant hajan els era chaud e sujan.
Vi dals yaks hajan tschels purs da la Stussavgia stuì s'endisar a l'entschatta. Els na migian numnadamain betg sco vatgas, mabain grugnan. «In u l'auter pur ha detg che quai na saja betg uschè bel», raquinta Angelika Bandli e ri. Uss dentant paran lamas, yaks e chamels d'esser ina part dal vitg. Dals vischins na guarda nagin pli curius, cura ch'ils Bandlis passan cun chamels.
-
Bild 1 von 6. Tar la famiglia Bandli gidan tuts cun da tgirar ils animals. Il bab Erwin, la mamma Angelika, ils fragliuns Mia, Beat ed Andri (da dretg). Bildquelle: MAD.
-
Bild 2 von 6. Ils dus lamas Emilio e Valor èn prompts per far lamatrekking. Bildquelle: RTR, Gierina Gabriel.
-
Bild 3 von 6. Als lamas vegn mess si ina sella cun la bagascha. Bildquelle: RTR, Gierina Gabriel.
-
Bild 4 von 6. Il chamel Aladin ha plitost gugent l'enviern che la stad. Bildquelle: RTR, Gierina Gabriel.
-
Bild 5 von 6. Dal prà en la boxa – mintga saira maina Angelika Bandli ils chamels puspè tras il vitg en lur boxas. Bildquelle: RTR, Gierina Gabriel.
-
Bild 6 von 6. Ils chamels stattan sur notg en lur boxas. Bildquelle: RTR, Gierina Gabriel.
RR actualitad 07:00