Il pajais patescha d'ina quarta unda d'infecziuns massiva, che n'ha fin uss betg pudì vegnir franada cun autras mesiras. Malgrà las campagnas intensivas per animar la populaziun da sa laschar vaccinar ed er las mesiras da protecziun, n'hajan betg avunda persunas sa laschà vaccinar, ha declerà Schallenberg. Il virus vegnia a restar e betg a svanir.
Nus na vulain nagina tschintgavla unda, nagina sisavla e setavla unda.
Il lockdown duai vegnir valità suenter 10 dis e duai cuzzar maximalmain 20 dis. Vinavant duai vegnir lavurà pli fitg en homeoffice, là nua che pussaivel. Geniturs vegnan supplitgads da betg trametter a scola lur uffants, las scolas restan dentant avertas per famiglias senza pussaivladad da tgira. I duai dar in obligatori da purtar mascrinas, er per tut ils livels da scola vala in tal obligatori.
A partir dals 13 da december saja il lockdown lura puspè passà per persunas vaccinadas e guaridas. Lura vul il pajais turnar tar la regla da 2G.
Dapi passa in'emna registrescha l'Austria sur 10'000 infecziuns novas a di. Clinicas vegnan a lur cunfins cun las capacitads. Fitg dramatica è la situaziun a Salzburg ed en l'Oberösterreich, cun incidenzas da 1'500 novas infecziuns sin 100'000 abitantas ed abitants.
