La stresa d'ozon è il mument sin buna via da sa revegnir aifer ils proxims decennis. Quai communitgescha in gremi d'experts da las Naziuns Unidas. La decisiun da desister da bleras substanzas che fan donn a la stresa d'ozon vegnia plinavant dabun a la protecziun dal clima.
Pudess sa revegnir cumplettamain fin il 2066
Sch'i giaja vinavant uschia dastgass la stresa d'ozon fin il 2066 en l'antarctica, fin il 2045 en l'arctica e fin il 2040 sin il rest dal mund sa revegnir sin il stan dal 1980 – quai è stà avant che la fora d'ozon è sa furmada.
L'onn 1987 è l'ONU sa cunvegnida en il protocol da Montreal da desister da clorofluorocarbons (FCKW), perquai che quels han donnegià la stresa. Questa stresa en l'atmosfera protegia la terra da radis ultraviolets dal sulegl.
Il 2016 è plinavant vegnì scumandà da las Naziuns Unidas pliras substanzas da sfradentar. Tenor ils experts pudess quai reducir la stgaudada globala fin il 2100 per 0,3 fin 0,5 grads.
