Ils cumbats en l’Afganistan èn a fin. Quai ha ditg in represchentant dals Talibans radical-islamics a l’emettur Al Jazeera. Avant avevan ils Talibans conquistà la chapitala da Kabul e occupà il palast dal president. Als islamists èsi gartegià da controllar bunamain l’entir pajais. E quai anc avant che las truppas americanas èn sa retratgas cumplettamain.
Segirezza a l'eroport
Suenter ch’ils Talibans radical-islamics han occupà il palast dal president en la chapitala afgana da Kabul segireschan ils Stadis Unids la partenza da lur persunal cun ulteriuras truppas.
Ins prendia ina seria da mesiras ed ins augmentia la preschientscha da segirezza a l’eroport da Kabul sin bunamain 6’000 schuldads, ha communitgà il ministeri da l’exteriur. Plinavant vegnian ins era a surprender la surveglianza dal spazi d’aria. L’agentura da novitads AFP rapporta, ch’ins haja prendì davent la bandiera en l’ambassada americana a Kabul. La gronda part dal persunal saja entant a l’eroport. Era auters pajais dal vest èn vidlonder da sgular ora il persunal da lur ambassadas e las collavuraturas e collavuraturs locals.
Il secretari general da l’ONU Antonio Guterres ha appellà als Talibans da respectar il dretg internaziunal umanitar e da schanegiar vitas umanas. Oz discutescha il cussegl da segirezza da l’ONU en ina sesida d’urgenza davart la situaziun en l’Afganistan.