Passa 250 persunas èn vegnidas arrestadas la dumengia a Minsk tar protestas da massa cunter il schef da stadi bieloruss Alexander Lukaschenko. Tenor il ministeri da l'intern èn las persunas vegnidas arrestadas pervia da participaziun ad ina manifestaziun da massa betg lubida e per avair gì simbols nunlubids. Bleras persunas avevan la bandiera istorica bielorussia (alv-cotschen-alv) ch'è daventada simbol per il moviment democratic.
Minsk segirà sc'ina fortezza
Passa 10'000 persunas hajan fatg part a las demonstraziuns a Minsk. Quai schegea che l'internet era deactivà per evitar ch'ils demonstrants possian communitgar davart la ruta dal til da protesta. La plazza da l'independenza saja stada circumdada d'unitads unifurmadas e bloccada cun giatters da metal, rapporta l'agentura da novitads tudestga DPA.
«Marsch dals eroxs» era per Kolesnikowa
Tar questa 5avla manifestaziun da dumengias suenter l'elecziun dal schef da stadi Alexander Lukaschenko sumegliava la chapitala bielorussa ad ina fortezza. Il moviment democratic aveva clamà a la demonstraziun cun il motto «Marsch dals eroxs» e l'avevan deditgà era a la manadra d'opposiziun Maria Kolesnikowa ch'è actualmain en arrest.
Er en autras citads dal pajais hai dà protestas. Dapi la reelecziun dispitaivla avant passa in mais da Lukaschenko datti mintga di acziuns da protestas cunter il politicher da 66 onns.