Fin dumengia notg èn grondas forzas da la polizia chinaisa stadas en acziun en il quartier da diplomats a Peking. Ellas han restrenschì demonstraziuns e tenor agenturas er arrestà persunas che participavan. Ils protests, che capitavan en pliras citads chinaisas, sa drizzan envers la politica da nulla-Covid da la regenza.
Arrestà e dà fridas a schurnalist da la BBC
Durant in dals protests a Schanghai è in reporter da la televisiun da la Svizra franzosa RTS, Michael Peuker, ensemen cun ses um da camera vegnids circumdads da la polizia amez lur emissiun live. El ha anc ditg durant ses rapport: «Las tensiuns qua èn sin lur punct culminant. Mussament per quai è ch'jau sun uss circumdà da policists». Immediat suenter sia emissiun, haja la polizia escortà el sin il post da polizia. Là haja el lura pudì s'identifitgar sco schurnalist, uschia ch'el e ses um da camera n'èn betg vegnids arrestads.
Mender èsi ì per il schurnalist da la BBC Ed Lawrence. La BBC annunzia ch'el è vegnì arrestà. Policists hajan pitgà il schurnalist e dà pajadas. Pir pliras uras pli tard saja el puspè vegnì liber. Er schurnalists da l'ARD sajan vegnids disturbads da la polizia durant lur lavur, scriva la manadra dal biro da la ARD a Peking sin Twitter.
Protests cunter politica da nulla-Covid
La regenza chinaisa restrenscha fermamain la vita publica sch'i dat cas da corona. Entirs blocs e quartiers vegnan sbarrads da las autoritads pervia da quai. Tar ils protests èsi vegnì tenor la DPA, suenter ch'in fieu ha mazzà 10 persunas en in bloc ad Urumqi, ina citad chinaisa. Sin las raits socialas èsi vegnì speculà ch'il bloc saja stà sbarrà pervia da cas da corona, e la glieud n'haja betg pudì ir ora svelt avunda, cura ch'i ha brischà.
Ils protests han cuzzà l'entira fin d'emna e sajan ils pli gronds dapi las demonstraziun da students e studentas il 1989 sin il plaz da Tiananmen.
