Suenter passa trais emnas para la bloccada dal congress d’esser a fin: La chombra dals represchentants ha finalmain elegì in nov pledader: Il republican Mike Johnson ha survegnì avunda vuschs per surpigliar il terz aut uffizi dals Stadis Unids. Quai rapportan pliras medias localas. Johnson ha 51 onns e vala sco hardliner. Il giurist da la Louisiana è in aderent loial da l’anteriur president Donald Trump.
19-10-2023
Parlament dals Stadis Unids anc adina bloccà
En ils Stadis Unids n'è il republican Jim Jordan gia duas giadas betg vegnì elegì sco speaker dal parlament. La segunda giada schizunt cun damain vuschs che l'emprima giada. Ad el han omaduas giadas mancà vuschs or da las atgna retschas. Tenor l'agentura da novitads Reuters na vul Jim Jordan betg ceder e candidescha ina terza giada. Uschia cuntinuescha la tschertga e la lavur politica en il parlament resta bloccada perquai ch'il parlament na po betg decider leschas senza president.
14-10-2023
Republicans han nominà Jim Jordan sco pledader
Ils republicans han nominà Jim Jordan sco nov pledader da la chombra dals represchentants. Quai dentant be piz a cup – sco medias americanas rapportan. Il hardliner vala sco confident da l’anteriur president Donald Trump. Uss duai el succeder a Kevin McCarthy ch’era vegnì mess giu sco speaker l’emna passada.
Sche Jim Jordan po vairamain surpigliar il terz aut uffizi dals Stadis Unids è dentant intschert. Ils republicans possedan mo ina pitschna maioritad en la chombra dals represchentants. Pervi da la vacanza en la chombra gronda dal congress è quel actualmain inabel d’agir. Quai er en vista al conflict en il Proxim Orient ed en l’Ucraina.
Scalise ha retratg sia candidatura sco parsura
Il republican Steve Scalise ha retratg sia candidatura sco pledader da la chombra dals represchentants. I na saja betg reussì al conservativ da segirar avunda vuschs entaifer sia atgna fracziun.
Gievgia ha la fracziun republicana gì nominà Steve Scalise sco pledader futur da la chasa dals represchentants. Dasper Scalise aveva cun Jim Jordan er candidà. Scalise ha fatg la cursa cun 113 encunter 99 vuschs.
