Siglir tar il cuntegn

Header

audio
Elecziuns en l'USA: Claudius Vincenz ed Anita Turner observan acceptanza
Or da Actualitad dals 09.11.2020.
laschar ir. Durada: 03:24 minutas.
cuntegn

Claudius Vincenz, Anita Turner Ils Americans paran d'acceptar la decisiun

Il democrat Joe Biden daventa nov president dals Stadis Unids da l'America. Donald Trump sto ir. Co resenta la populaziun la situaziun actuala? Dus Rumantschs ch'abitan a Michigan e Texas raquintan.

Claudius Vincenz stat en il stadi federal da Michigan ed ha vuschà per Joe Biden ed Anita Turner stat en il stadi federal da Texas ed ha vuschà per Donald Trump. Uss è l’elecziun decidida.

Nagins chaus cotschens

Anita Turner ha 62 onns e stat cun ses um ad Austin en il stadi federativ Texas. La dumbraziun da las vuschs mussa, che la gronda part dals Texans ha vuschà per l’anteriur president Donald Trump, uschia er Anita Turner. Uss che Donald Trump ha pers il cumbat electoral, haja adina puspè dà gruppas ch’èn sa scuntrads en la citad, dentant na saja betg vegnì tar acts da violenza. En general èn blers da l’opiniun, ch’i saja donn che Donald Trump n’è betg pli president e tuttina acceptian ils blers il resultat. Ella è persvadida, che sche Joe Biden avess pers, lura fissi vegnì tar pli extremas demonstraziuns suenter las elecziuns che quai ch’igl è ussa il cas.

Ils fans da Trump vegnan unfis

Era en il stadi federativ da Michigan haja la glieud protestà il di suenter l’elecziun, di Claudius Vincenz ch’ha vuschà per Joe Biden. El saja stà il di suenter l’elecziun en la vischinanza dal vitg Ann Arbor, nua ch’el aveva vis enturn 100 «trump-supportes» che demonstravan cun transparents cunter la decisiun davant la chasa communala. El haja dentant gì l’impressiun che la glieud che demonstrava aveva pauca energia.

RTR actualitad 07:00

Artitgels legids il pli savens

Scrollar a sanestra Scrollar a dretga