Scienziads da la Finlanda han perscrutà che las regiuns arcticas èn sa stgaudadas quatter giadas uschè spert sco la media globala en ils davos 43 onns. Quai scrivan els en il magasin «Communications Earth & Environment». Ils models da clima hajan sutvalità l'uschenumnà rinforz polar, ha ditg l’autur principal Mika Rantanen. Ins haja quintà fin uss cun in stgaudament dubel uschè svelt en l'Arctica. Lur nova definiziun da l'Arctica – tut la surfatscha entaifer il circul polar – ed il spazi da temp ch’els han resguardà ha probabel influenzà che lur stimaziun è tant pli auta che la veglia.
La gruppa aveva gia constatà l’onn 2021 in augment da la temperatura da 3,1 grads da la surfatscha arctica tranter 1971 e 2019 – trais giadas pli aut che la media globala. Il grond augment saja chaschunà tant da la midada dal clima pervia d'activitads dals umans sco era da fluctuaziuns dal clima natiralas a lung temp.