RTR: Dunna Sieber, Vus abitais dapi 13 onns a Dubai. Cun Voss um organisais Vus turas privatas ed enconuschais la citad. Co è la situaziun actuala?
Gretigna Sieber: La situaziun a Dubai n'è betg uschè precara sco ins legia en las gasettas. La glieud na va betg ord chasa uschè savens sco normal e las vias n'èn betg uschè plainas perquai che las autoritads instrueschan da star a chasa. La situaziun sumeglia a Covid, ma ins s'accorscha betg fermamain. Igl è quiet, tranteren audan ins dentant detonaziuns pli dalunsch, magari era pli damanaivel. Quai n'essan nus betg disads e quai va sa chapescha tras pel ed ossa.
Co communitgeschan las autoritads?
Ellas èn fitg avanzadas ed han in bun sistem d'alarm via telefonin. L'emprima giada è in alarm arrivà la sonda curt avant mesanotg cun il messadi da star en l'abitaziun e da betg bandunar la chasa. Igl aveva num da star davent da las fanestras, per il cas d'ina detonaziun che rumpa quellas. Ins vegn infurmà fitg bain ed ins ha l'impressiun dad esser segir.
Co vegn il conflict percepì al lieu?
La solidaritad è enorma. La sonda saira per exempel aveva num che nus stuain sa radunar en la lobby. Nus abitain en la 15avla da 31 alzadas ed essan lura ids en la garascha dus plauns sut terra, nua ch'ins sa senta segir e nua ch'ins na senta betg las detonaziuns. La situaziun era surreala. Nus avain quella notg durmì en l'auto pervia che nus n'avain betg survegnì la conferma da pudair turnar en l'abitaziun enfin las 06:00 la bun'ura. Ins ha lura gì l'occasiun d'entuppar vischins ch'ins n'enconuschava betg, perquai ch'ins viva uschè anonim.
È la tema pli gronda u prevala la confidenza en las autoritads?
Nus ans fidain da las autoritads. Il sistem da defensiun è in dal meglier dal mund e tut ils pajas en la regiun dal Golf han quel sistem. Ils davos dis ha il sistem sajettà giu 165 rachetas e 541 dronas, senza ch'insatge pli grond è capità. Quai è in bun segn che las autoritads èn organisadas bain. Ins ha segir tema da detonaziuns ed explosiuns. Per l'ina n'essan nus betg disads quai e betg creschids si cun guerras e per l'autra, tgi avess spetgà che Dubai vegn attatgà? Jau di adina als giasts da mias turas: «Qua a Dubai na stuais mai avair tema, qua na capita mai insatge!», ed uss ans vesa quant spert che quai po sa midar.
Pon ins dir ch'igl n'è betg ina tema ma in respect d'ina nova situaziun?
Gea, jau less schon dir. Cunquai ch'igl è plitost quiet tar nus sper'ins ch'i vegnia bun. Tge porta d'avair memia gronda tema? Tema fa adina vegnir mender la chaussa. Nus sperain ch'i sa quietescha, ch'ins po chattar in consens e che tut vegn puspè sco igl è stà.