Il president da la Serbia ha discurrì cun abitants serbs dal Cosovo e silsuenter annunzià la fin da las bloccadas da vias serbas. Las bloccadas duain vegnidas schliadas la gievgia.
Ils abitants serbs han mess si las bloccadas cun camiuns ed autos suenter ch'in anteriur policist serb è vegnì arrestà pervia da sia attatga sin in policist cosovar. Ina dretgira cosovara ha uss relaschà il policist e mess el en arrest da chasa.
Era hajan l'UE ed ils Stadis Unids da l'America dà la garanzia ch'ils organisaturs da las bloccadas na vegnian betg persequitads penalamain, di il president serb.
En la citad cosovara Mitrovica han Serbas e Serbs erigì ina barricada che blochescha in quartier d'abitants cun etnia albanaisa. La citad è en il nord dal pajais nua che blers Serbs abiteschan.
Cosovo serra passagis, Serbia smanatscha cun l'armada
Pervi da las tensiuns ha il president serb, Aleksandar Vucic, mess l’armada serba en prontezza d’alarm il glindesdi. La regenza a Belgrad pretenda da stuair proteger ils dretgs da la minoritad serba en il Cosovo. Il Cosova da sia vart ha serrà trais passagis da cunfins cun la Serbia.
Svizra ed UE teman escalaziun
Gia dapi duas emnas datti da pliras varts appels da betg laschar escalar la situaziun. Ils appels sa drizzan ad omaduas varts. Tenor SRF trametta l'UE, la Frantscha e la Germania adina puspè expertas ed experts en la regiun per schliar il conflict diplomaticamain.
Er la Svizra ha uss appellà. Las missiuns internaziunalas en il Nord dal Cosovo sajan decisivas per segirar la pasch e la segirtad da la populaziun en la regiun, ha ditg il departament da l'exteriur EDA. A la missiun da pasch da la NATO è era l'armada svizra participada.
Dapi l'onn 1999 garantescha la missiun da la KFOR, manada da la NATO, la segirtad en il Cosovo. Er actualmain sajan truppas da la KFOR al nord dal pajais per evitar che conflicts escaleschan.
Numers d'autos sco simbol per la politica
En il nord dal Cosovo, tar il cunfin cun la Serbia, datti gia dapi onns adina puspè conflicts. Là vivan numnadamain blers Serbs. La Serbia sezza na renconuscha betg il Cosovo sco stadi independent.
Motivs per las dispitas èn adina puspè detagls tecnics u dacurt numers d'auto. Naziunalists Serbs na vulevan betg acceptar numers d'autos dal Cosovo. La regenza dal Cosovo vuleva sinaquai introducir chastis per numers d'autos serbs illegals. Quel conflicts han ins atgnamain schlià. Tenor il correspundent da l'Europa da l’ost dad SRF, Peter Balzli, haja la Serbia dentant nizzegià quella dispita per laschar escalar la situaziun.
