Il president brasilian, Luiz Inácio Lula da Silva, renfatscha a l’Uniun europeica da sa maschadar en affars interns dals stadis sidamericans. Concret vai per ina convenziun da commerzi liber tranter l’UE ed il bloc da commerzi sidamerican «Mercosur».
Tenor Lula vul l’UE introducir mesiras discriminantas cun ina decleraziun davart l’ambient ed ils dretgs umans. Sut il pretext da quels discrimineschian las mesiras ils pajais e restrenschian lur svilup.
El pretenda dals stadis industrials da contribuir lur part per la protecziun da l’ambient e dal clima, cunquai ch’ils 10% ils pli ritgs dal mund sajan responsabels per la mesadad da l’emissiun da CO2, uschia Lula a la fin da l’inscunter suprem dals stadis da l’Amazonas. Il president ha annunzià da terminar la deforestaziun da l'Amazonas en ses pajais fin il 2030, in'impurtanta contribuziun per franar la stgaudada dal clima tenor scienziadas.
