Siglir tar il cuntegn

Header

video
Impressiuns da la situaziun en l'India - Lara Natalia Hänny raquinta
Or da RTR Social dals 30.04.2021.
laschar ir
cuntegn

Covid-19 en l'India «Glieud dumonda en las raits socialas suenter oxigen»

Passa 400'000 novas infecziuns e 3'500 unfrendas dal coronavirus entaifer in di. La situaziun cun il coronavirus en l'India è precara. Amez quai caos è Lara Hänny ch'è oriunda da Castrisch. Ella raquinta da scenas terriblas.

Las scenas che Lara Natalia Hänny ha vesì pudessan esser ord in film catastrofa da hollywood, ma tuttina èsi la realitad. Ina bara suenter l'autra vegn arsa publicamain en crematoris ordavert. Dapi in mais è Lara Natalia Hänny a Dehli nua ch’ella documentescha tut sco reportra independenta. Ella declera che la situaziun saja cunzunt l’emna passada stada fitg tendida. Durant il lockdown haja dà bler pli pauc traffic sin las vias che fissan normalmain fullannadas. Quellas persunas ch'ins chattia sin via, portian quasi tuttas ina mascra da protecziun.

audio
Covid-19 en l'India: Lara Natalia Hänny raquinta da la situaziun a Dehli
03:28 min, Sport ed actualitad dals 01.05.2021.
laschar ir. Durada: 03:28 minutas.

Infrastructura manca

Ils ospitals a Delhi na sajan betg endrizzads per ina tala situaziun declera Lara Natalia Hänny. I dettia ina gronda mancanza d'oxigen, da medicaments e da tests. Quella mancanza da meds per tractar ils infectads e las infectadas saja da sentir fermamain. Per exempel haja ella vis en las raits socialas co che ina u l’auter haja fatg in post e dumandà sch’insatgi haja anc oxigen per in commember da la famiglia.

I dat glieud che dumonda en las raits socialas suenter oxigen per l’atgna tatta.
Autur: Lara Natalia Hännyreportra independenta

Ina situaziun che stanclenteschia

Atgnamain vuleva Lara Natalia Hänny turnar bainspert puspè en Svizra, dentant n'haja ella pudì far nagliur il test obligatoric per dastgar entrar en l’aviun. Uschia saja ella sa decidida da restar pli ditg en l’India per documentar tge che capitia cun fotografias e films. Era sche las scenas ch’ella vesia di per di, dettian sin il magun, possia ella sa distanziar bain da quai. Ma tuttina sa sentia ella pli stancla la saira ch’avant la derasaziun ferma dal virus. Però i saja in'impurtanta lavur da discurrer cun la glieud al lieu e da documentar tut quai che capitia.

Situaziun sa pegiurescha vinavant en l'entir pajais

Gia dapi dis annunzia l'India mintga di novas cifras da record pertutgant novas infecziuns e mortoris pervi dal coronavirus. Tenor il ministeri da sanadad sajan ospitals sco er crematoris cumplettamain surdumandads en il pajas cun passa 1,3 milliardas abitantas ed abitants.

Tenor il plan da la regenza duain en sasez tuttas persunas creschidas survegnir a partir da questa sonda il vaccin, ma en blers centers saja il vaccin gia duvrà. Fin uss hajan be radund 2% da la populaziun survegnì la segunda dosa dal vaccin.

RTR actualitad 06:00

Artitgels legids il pli savens

Scrollar a sanestra Scrollar a dretga