Siglir tar il cuntegn

Header

cuntegn

Critica da PPS ed AdC Svizra duai reagir ussa e pretender tests negativs dals Chinais

Quai pretendan la PPS e l'Allianza dal Center, suenter ch'il Cussegl federal ha decis da desister sin quest obligatori.

Auter ch'ils blers pajais da l'UE desista la Svizra il mument d'in obligatori da far tests per viagiaturs da la China. Enstagl vegn cusseglià a questas persunas da purtar ina mascrina e da suandar las mesiras d'igiena. Quai ha decis il Cussegl federal. La situaziun epidemiologica na pretendia il mument betg in obligatori. Cunquai ch'i circuleschia en China il mument variantas dad omicron saja la ristga per la populaziun en Svizra ed il sistem da sanadad pitschna, uschia l'argumentaziun.

PPS ed Allianza dal Center critigeschan questa decisiun

La Partida populara svizra e l’Allianza dal center crititgeschan la decisiun dal Cussegl federal. Las duas partidas mussan pauca chapientscha per la decisiun.

Il schef da la fracziun da la Partida populara svizra Thomas Äschi ha ditg envers l’agentura da novitads Keystone SDA, che tenor el fissi meglier sche la Svizra reageschia gia ussa, uschia sco blers auters pajais.

Era l'Allianza dal Center vesa quai uschia: Sin twitter scriva la partida che pervi dal svelt ed inconuschent svilup da la situaziun fissi meglier da reagir ussa. Era perquai che la UE sco era l’organisaziun mundiala da sanadad WHO recumondan in obligatori da test per persunas che viagian da la China en Svizra.

Dad autra opiniun è la Partida liberaldemocratica, quella sustegna la decisiun dal Cussegl federal.

Pajais europeics pretendan resultat da test negativ

En l'UE ed auters pajais valan reglas per viagiants e viagiantas or da la China, il pli bler ston els mussar in resultat da test negativ.

  • En la Corea dal Sid ston persunas or da la China porscher in test negativ avant la partenza da l'aviun sco er cura che l'aviun è arrivads en la Corea dal Sid.
  • Ils Stadis Unids da l'America laschan far mintga viagiatur in test tar l'entrada en il pajais.

Sco il minister da sanadad da l'Italia ha ditg circuleschan mo variantas da corona ch'ins enconuscha gia en China. Ins tema dentant ch'ils blers cas en la China porschan novas pussaivladads per mutaziuns dal virus.

Suenter che la regenza da la China ha schluccà lur politica da restrenscher ed isolar mintga persuna infectada cun corona, s'infectescha ina gronda part da la populaziun. Tenor stimaziuns internas e betg confirmadas da la regenza han bunamain 250 milliuns persunas (18% da la populaziun) survegnì la malsogna en il december.

RTR novitads 11:00

Artitgels legids il pli savens

Scrollar a sanestra Scrollar a dretga