- La squadra dad Alexej Nawalny ha annunzià, che sia sepultura saja il venderdi a Moscau.
- Il criticher da la regenza russa, Alexej Nawalny, è mort tenor las autoritads russas ils 16 da favrer.
- Il politicher da l'opposiziun da 47 onns era en ina colonia penitenziara, cun in chasti da trais onns pervi d'extremissem. Sia organisaziun è vegnida scumandada e blers commembers èn fugids en l'exteriur.
Il criticher da la regenza russa Alexei Nawalny ch'è mort en in champ da correcziun, vegn sepulì il venderdi a Moscau. Da mezdi duai dar in funeral – suenter vegn el sepulì sin il santeri da Borissowskoje. Tenor la squadra da Nawalny n’èsi betg stà simpel da chattar in lieu per la commemoraziun. Las autoritads russas hajan engrevgià las preparativas.
La vaiva da Nawalny, Julia Nawalnaja ha gia exprimì sia preoccupaziun, pervi da violenza pussaivla ed arrestaziuns tar la sepultura a Moscau. Tar in pled en il parlament d'Europa a Strasbourg ha ella manegià, ch'ella na sappia anc betg quant paschaivel ch'il cumià da ses um possia succeder. Ni sche la polizia vegnia ad arrestar quels che sa radunian per prender cumià.
Ina fin plain ensainas da dumonda
Las autoritads russas han annunzià la mort dad Alexej Nawalny ils 16 da favrer. El saja sa sentì mal suenter ina spassegiada ed haja quasi immediat pers la schientscha, ha communitgà la praschun en la quala Nawalny era serrà en. La raschun daco che Nawalny è mort è vinavant nunclera. Sin l'attest da mort duai esser menziunada ina raschun da la mort natirala.
Nawalny – ch'aveva 47 onns – era vegnì sentenzià a passa 30 onns arrest. Ad el era tranter auter vegnì reproschà fraud ed extremissem. Nawalny aveva adina refusà las reproschas ed accentuà ch'i giaja per supprimer critica envers Putin.
Consternaziun en Russia ed a l'ester
Politichers, sco p.ex. il president american Joe Biden, il president ucranais Wolodimir Selenski u la presidenta da la cumissiun da l'UE, Ursula von der Leyen, renfatschan al president russ Wladimir Putin d’esser responsabel per la mort da ses pli grond criticher. En bleras citads – tranter auter er a Turitg e Genevra – èn persunas vegnidas ensemen per commemorar Nawalny. Er en citads russas hai dà commemoraziuns. Passa tschient persunas sajan vegnidas arrestadas, rapportan organisaziuns nunguvernamentalas.
