La regenza a Roma ha serrà vastas parts. Pertutgadas èn la regiun Lombardia e 14 provinzas, tranter auter la Valtellina che cunfinescha cun il Grischun. Pertutgà da questa bloccada è era la metropola d'economia Milaun sco era l'attracziun turistica Venezia.
Las activitads internas duain vegnir limitadas sin l'essenzial. Implants da skis, museums, kinos ed auters indrizs publics vegnan serrads. Las novas mesiras vegnan a midar vinavant il mintgadi dals var 60 milliuns abitants. Quai suenter che las mesiras da serrar las scolas pertutgan gia oz blers dad els.
Territori da bloccada fin almain ils 3 d'avrigl
Las mesiras valan a partir dad immediat fin almain ils 3 d'avrigl. Ins po bandunar las zonas u entrar en las zonas be «pervi da motivs serius ed inevitabels», sco per exempel per ir a la lavur u ord motivs famigliars.
L'Italia è il pajais europeic cun las pli bleras infecziuns. Era cun tut las vastas cuntramesiras crescha il dumber dals infectads. Fin ier eran prest 6'000 persunas infectadas. 233 èn mortas.
Distanza minimala per visitaders da bars
Era en las zonas bloccadas na pon ils abitants betg sa mover libramain. I regna ina mobilitad restrenschida. Ins duai bandunar la chasa be sch'ins ha in bun motiv. Bars ed ustarias èn avertas be da la damaun las 6 fin la saira las 18:00 uras. Quai vala dentant be, sch'i vegn guardà ch'ils giasts han ina distanza minimala d'in meter tranter els. Era il temp d'avertura da las butias è restrenschì.
RTR novitads 06:00