Siglir tar il cuntegn

Header

cuntegn

Cumbat per il Brexit Corbyn fa liber la via per elecziuns

Jeremy Corbyn, il manader da l'opposiziun e schef da la partida Labour vul uss tuttina sustegnair las elecziuns parlamentaras anticipadas proponidas da Boris Johnson.

  • La chombra dals deputads pudess tuttina anc approvar ils plans per elecziuns novas. Per Corbyn èn las cundiziuns ademplidas.
  • Suenter che l'UE ha approvà il nov spustament da la sortida saja giu da maisa in «no deal» Brexit. Quai era ina cundiziun da la partida Labour.

Anc il glindesdi saira ha ina proposta dal primminister Boris Johnson per elecziuns novas fatg naufragi. 299 deputads han votà per las elecziuns anticipadas il december. Uschia ha Johnson manchentà cleramain la maioritad da dus terzs. Almain 434 vuschs fissan stadas necessarias. Johnson ha uschia vulì reconquistar ils 12 da december la maioritad en il parlament ed uschia schliar la dispita da Brexit.

Plan B per elecziuns novas

Ma il schef da regenza na dat betg si. Gia suenter l'annunzia dal resultat ha Johnson ditg ch'el veglia preschentar in sboz da lescha che basegna sulet ina maioritad simpla. El speculescha uschia sin il sustegn da las partidas d'opposiziun pitschnas. Ils liberaldemocrats e la partida naziunala da la Scozia SNP avevan signalisà ch'ellas sustegnessan sin questa via elecziuns gia ils 9 da december. Oz duai il parlament cumenzar a tractar il nov sboz. Quel dovra dentant pliras lecturas.

Tge ch'è capità fin uss

Personen-Box aufklappenPersonen-Box zuklappen
  • Ils Brits avevan avant pli che trais onns, la stad 2016, en in referendum cun approvà ina pitschna minoritad da sortir da l'Uniun europeica.
  • Oriundamain era planisà che la Gronda Britannia sortia ils 29 da mars da l'Uniun europeica. Quest termin è dentant vegnì spustà duas giadas la primavaira.
  • L'antecessura da Johnson, Theresa May, n'è betg reussida en il parlament britannic cun il Brexit-deal ch'ella aveva fatg cun Brüssel.
  • Era la cunvegna da Johnson per in Brexit-deal ha fatg naufragi.
  • Il glindesdi passà è la UE perquai sa cunvegnida ad ina prolungaziun flexibla dal termin dal Brexit per fin a trais mais.
  • Il pli tard ils 31 da schaner 2020 duai pia succeder la sortida da l'UE. Quella è dentant era pussaivla pli baud, sch'igl avess da gartegiar da ratifitgar avant ina cunvegna da Brexit.

RR novitads 06:00