Il milliardari e fundatur da Tesla, Elon Musk, na vul uss tuttina betg cumprar il servetsch da novitads curtas Twitter. La cunvegna da cumpra saja annullada, han communitgà ses advocats. L’argumentaziun: Twitter haja fatg indicaziuns manglusas davart il dumber da contos da fake sin la plattafurma che na possian betg vegnir verifitgadas.
Dispita davart dumber da contos fauss
Musk ha gia dapi emnas mess en dubi publicamain las cifras da Twitter. Observaders han interpretà quai sco emprova da smatgar almain il pretsch da cumpra. Dentant na pudessi betg esser uschè simpel per Musk da sa trair or da l’affera. Cunquai ch’il management da Twitter insista sin la fatschenta, èsi da quintar cun ina lunga dispita giuridica. Oriundamain vuleva Musk cumprar Twitter per 44 milliardas dollars.
