Tenor atgnas indicaziuns na vul l'Iran betg pli sa tegnair vi da la limita lubida da 3,67% per concentrar uran. Tenor basegn vul l'Iran augmentar la concentraziun d'uran sin 5 fin 20%.
Cunvegna vul evitar armas atomicas en l'Iran
La cunvegna ch'era vegnida suttascritta il 2015 tranter las pussanzas da veto da l'ONU e l'Iran vuleva impedir ch'il pajais construeschia ina bumba atomara. Sco cuntramesira eran las sancziuns economicas cunter l'Iran vegnidas abolidas. L'onn passà en ils Stadis Unids però sortids da la cunvegna ed han decis sancziuns encunter l'Iran.
Avant dus mais aveva la regenza a Teheran perquai appellà als partenaris da cunvegna da chattar ina soluziun, autramain sortia l'Iran da la cunvegna.
Uniun europeica extrem preoccupada
L'Uniun europeica ha en sia reacziun accentuà ch'ella saja extrem pre-occupada pervia da l'annunzia da l'Iran d'augmentar la concentraziun da l'uran ed uschia rumper la cunvegna d'atom. L'incumbensada da l'UE per l'exteriur, Federica Mocherini, ha entant appellà a l'Iran da franar tut las actitivads che cuntrafetschian a la cunvegna.
RR novitads 15:00