Siglir tar il cuntegn

Header

Navigaziun

cuntegn

Stadis Unids vs. Iran Iran atgisa Stadis Unids da bloccar via diplomatica

Las tensiuns tranter ils Stadis Unids e l'Iran creschan. Fertant che l'Iran renfatscha als Stadis Unids da smanzegnar davart lur voluntad da negoziar admonescha la China da restar «calm e moderà». Quai scrivan las agenturas da novitads SDA e l'AFP.

Per l'Iran sajan las novas sancziuns americanas, che sa drizzan cunter il manader religius Ajatollah Ali Chamenei ed autras persunalitads, la fin da la diplomazia.

Sancziuns èn «impertinentas»

«Impertinentas» sajan pli novas sancziuns dals Stadis Unids cunter il manader religius Ajatollah Ali Chamenei ed autras persunalitads – quai di il president da l'Iran Hassan Rouhani:

Questa Chas'alva patescha da difficultads mentalas. Ella na sa betg pli tge far.
Autur: Hassan Rouhanipresident da l'Iran

Zunt las sancziuns cunter il minister da l'exteriur Mohammed Dschawad Sarif mussian ch'ils Stadis Unids smanzegnan sch'els discurran da lur voluntad da negoziar, vegn cità Rouhani da las agenturas da novitads. Senza minister da l'exteriur na saja nagina diplomazia pussaivla.

Russia para da cuntradir als Stadis Unids

Far ulteriur fieu en il conflict savess in nov aspect ord la Russia. Uschia citescha l'agentura da novitads svizra SDA in rapport da medias israelianas: Tenor la gasetta Haaretz haja il secretari da segirtad Russ ditg a l'ur dad in inscunter en l'Israel che la drona americana sajettada giu da l'Iran l'emna passada saja stada en il spazi d'aria da l'Iran.

La Russia haja infurmaziuns correspundentas che derivian or da circuls da servetschs secrets.

China admonescha da pressiun maximala

Fertant che las tensiuns creschan suenter las sancziuns novas dal president american Trump envers Teheran, è er s'annunziada la China. Ella appellescha da restar «calm e moderà»:

Nus crajain che da far tschorvamain pressiun maximala na vegn betg a gidar da resolver il problem.
Autur: Geng Shuangportavusch ministeri da l'exteriur, China

Ils fatgs hajan mussà che questas mesiras effectueschian il cuntrari ed augmentian il malruaus en la regiun, ha Geng agiuntà.

RR novitads 10:00