En l’Israel èn danovamain millis da persunas idas sin via per demonstrar cunter la refurma da la giustia dispitaivla. Quai suenter ch’il parlament ha approvà quella en puncts centrals. En plirs lieus haja dà charplinas tranter demonstrants e la polizia rapportan medias localas. Adversaris da la refurma hajan bloccà pliras vias en l’entir pajais, uschia er in’autostrada a Tel Aviv. La polizia haja arrestà passa 30 persunas.
En la televisiun ha il primminister Benjamin Netanjahu danovamain defendì la refurma da la giustia. Quella na saja betg la fin da la democrazia, mabain adempleschia la voluntad dals electurs ed electuras. La regenza dretg-religiusa da Netanjahu vul cun la refurma da la giustia restrenscher las pussaivladads d’agir dal tribunal suprem. Il parlament po suenter la refurma annullar decisiuns dal tribunal suprem.
