Siglir tar il cuntegn

Header

Navigaziun

Donald Trump stat avant in mir e mussa cun in det.
Legenda: Donald Trump ha cuntanschì in success en las discussiuns per construir il mir cunter il Mexico. Reuters
cuntegn

Dretgira suprema Trump dastga bajegiar mir cunter il Mexico

Tenor il Supreme Court dastga la regenza americana duvrar daners dal ministeri da defensiun per construir il mir al cunfin cun il Mexico.

Il Supreme Court ha uschia annullà ina decisiun dad instanzas pli bassas. Il matg aveva in derschader federal en la California decretà ina disposiziun provisorica, ch’aveva scumandà a Trump da duvrar daners per construir il mir al cunfin cun il Mexico, betg lubids dal congress. Ina dretgira d’appellaziun aveva silsuenter confermà questa sentenzia.

Uss ha la pli auta dretgira americana, il Supreme Court, decis cun tschintg cunter quatter vuschs, ch’ina disposiziun provisorica d’in derschader federal na saja betg permessa.

Cun ils daners vul il president american bajegiar dus tocs dal mir desiderà, en ils stadis Arizona e New Mexico. Perquai ch’il congress american aveva refusà da conceder ils daners per construir il mir dispitaivel, aveva il president Donald Trump vulì guntgir il congress e duvrar 2,5 milliardas dollars dal budget da l’armada. Uss ha el glisch verda per far quai.

Impurtanta decisiun per Trump

Da construir in mir al cunfin cun il Mexico, è stada ina da las empermischuns centralas durant il cumbat electoral da Trump. Suenter la decisiun dal Supreme Court ha el numnà la decisiun via Twitter, sco gronda victoria per la segirezza al cunfin e per il stadi da dretg.

RR novitads 06:00