La Fed augmenta il tschains directiv puspè per 0,75 puncts procentuals. Uschia saja la marscha da tschains uss tranter 2,25 fin 2,5 pertschient, sco il schef da l’Institut d’emissiun Jerome Powell ha annunzià. La finamira saja da sbassar la rata d’inflaziun a lunga vista sin 2 pertschient. La Fed è sut grond squitsch, cunquai che la chareschia è uschè auta sco dapi decennis betg pli. Quai mussan era ils auts pretschs da consum en ils Stadis Unids.
Questa politica monetara da la Fed po dentant er esser ristganta. In augment dal tschains directiv fa bain vegnir pli chars ils credits e fraina uschia er la dumonda. Quai gida da sbassar la rata d’inflaziun. Il medem mument fraina quai dentant era la conjunctura. E gliez pudess manar ad ina recessiun ed uschia puspè augmentar la quota da dischoccupaziun en ils Stadis Unids.
Ed ina recessiun en ils Stadis Unids avess consequenzas negativas directas sin l’economia en Svizra.
