En il Cosovo ha la partida da sanestra Vetevendosje cun ses program cunter la corrupziun gudagnà l’elecziun dal parlament. La partida da l’anteriur defensur dals dretgs civils, Albin Kurti, vegn sin 48% da las vuschs. Quai ha communitgà la cumissiun electorala a Pristina suenter che las bleras vuschs èn dumbradas. La partida PDK – ch’è stada blers onn en la regenza – vegn sin 17%; la partida conservativa LDK sin 13% da las vuschs.
Las prioritads da sia partida sajan giustia e plazzas da lavur, ha declerà il victur da l’elecziun, Albin Kurti. Las ulteriuras partidas han acceptà il resultat electoral e gratulà a Kurti. Gia tar las elecziuns dad avant dus onns aveva Kurti pudì persvader ils votants e las votantas. Suenter be 50 dis en uffizi era el dentant la primavaira avant in onn vegnì bittà ord uffizi da las forzas politicas veglias.
