Siglir tar il cuntegn

Header

Navigaziun

Frans Timmermanns, il topcandidat dals Socialdemocrats en ils Pajais Bass che dat giu la vusch.
Legenda: Tenor retschertgas èn ils Socialdemocrats a la testa. Keystone
cuntegn

Elecziuns d'Europa 2019 Surpraisa en ils Pajais Bass

Tar las elecziuns en il parlament europeic èn – tenor prognosas – surprendentamain ils Socialdemocrats a la testa. Els cuntanschan bun 18% da las vuschs, quai che munta 5 dals 26 sezs giessan ad els. Mintgamai 4 sezs cuntanschessan las duas partidas da la regenza dal prim-minister Mark Rutte e la cristian-conservativa CDA.

La partida populistica da la dretga «Forum per democrazia» vegniss sin 3 sezs. Experts avevan plitost spetgà ch'ils populists da la dretga ed adversaris da l'UE fetschian dapli vuschs.

Elecziuns cuzzan quatter dis

Il segund di da las elecziuns europeicas tutga il venderdi a l’Irlanda ed a la Tschechia. En l’Irlanda èn ils locals da vuschar gia averts. Tenor il parlament da l’UE han var 3,7 milliuns persunas il dretg d’eleger. Il cumbat electoral è vegnì dominà là da pro-Europeans.En la Tschechia avran ils locals da vuschar quest suentermezdi a las 14:00.

Sper ils Pajais Bass ha era la Gronda Britannia gia elegì la gievgia. La sonda
elegia lura la Lettonia, la Malta e la Slovachia. En il rest dals pajas èn las elecziuns dal parlament europeic lura la dumengia.

Resultats uffizials pir dumengia saira

»Resultats uffizials dastgan vegnir publitgads pir dumengia saira, cura che las elecziuns d'Europa en tut ils 28 pajais commembers èn terminadas.

RR novitads 06:00