Siglir tar il cuntegn

Header

Els dus ad ina sesida.
Legenda: Norbert Hofer, schef actual da la FPÖ, e Heinz-Christian Strache, anteriur schef da la FPÖ. Keystone
cuntegn

Elecziuns en Austria 2019 Strache terminescha carriera politica – e FPÖ discuta avegnir

Suenter las elecziuns dal parlament en l’Austria vul la FPÖ discutar davart las consequenzas da sia terrada.

Gia reagì ha l'anteriur schef da partida Heinz-Christian Strache. Ad ina conferenza da medias a Vienna ha el annunzià da sa retrair cumplettamain da la politica e da la vita publica e betg pli aspirar a posiziuns politicas. La commembranza tar la FPÖ veglia el suspender. Quai rapporteschan las agenturas SDA e DPA.

El fetschia quai era per proteger sia famiglia. Plinavant veglia el era evitar ch’il donn per la FPÖ daventia anc pli grond e che la partida rompia dapart.

La partida da dretga aveva numnadamain er vulì decider, sche Strache duai vegnir sclaus da la partida u betg.

Il scandal davart il video d’Ibiza cun Strache aveva chaschunà la fin da la coaliziun tranter la ÖVP e la FPÖ. Plinavant vegni era investigà cunter Strache pervi dal suspect da malfidaivladad. El ha para pajà quints privats sur la partida. Strache aveva adina snegà d’avair fatg quai.

RR novitads 06:00+