Siglir tar il cuntegn

Header

cuntegn

Elecziuns en ils Stadis Unids Biden maina uss er en Pennsylvania

La cursa tranter Donald Trump e Joe Biden vegn pli e pli stretga. Il mument maina Biden cun 253 vuschs d'electurs, Trump suonda cun 213 vuschs. Quests stadis n'han anc betg dumbrà a fin tuttas vuschs:

  • Georgia: Ils resultats vegnan publitgads cuntinuant. Joe Biden ha entant surpiglià la testa, cun passa 7'200 vuschs avantatg sin Donald Trump.
  • Arizona: L'avantatg che Joe Biden ha a Donald Trump munata a prest 30'000 vuschs. Ulteriurs resultats vegnan spetgads oz.
  • Pennsylvania: Actualmain maina Biden en Pennsylvania cun passa 28'000 vuschs avantatg. Ils resultats vegnan publitgads cuntinuant. Las autoritads van da quai ora ch'i pon dumbrar ora oz las pli bleras vuschs.
  • Nevada: Biden maina actualmain cun bun 22'000 vuschs avant Trump. I vegn quintà che tuttas vuschs sajan quintà fin dumengia saira. Resultats intermediars duai dentant dar gia oz.
  • North Carolina: Actualmain ha Trump in avantatg da passa 76'000 vuschs. En quest stadi èn vuschs dadas giu per brev valaivlas, sch'ellas arrivan enfin ils 12 da november. Quai sch'igl èn vegnidas inoltradas il di da las elecziuns. Il resultat definitiv vegnia betg communitgà avant l'emna proxima.

La cursa resta averta

La dumonda è simpla: Resta Donald Trump (74) president dals Stadis Unids u vegn Joe Biden (77) il nov um pussant a Washington D.C.? La cursa per la Chas'alva è vinavant averta. La decisiun vegn probablamain pir a crudar en in pèr dis.

Trump ha reclamà victoria per el

Malgrà che Donald Trump è anticipadamain sa declerà sco victur da l'elecziun, ha ses contrahent Joe Biden vinavant schanzas da daventar il 46avel president dals Stadis Unids. Tgi che gudogna la finala, vegn decis ina giada dapli en ils Swing States sco Pennsylvania, Wisconsin e Michigan. Wisconsin e Michigan ha entant Joe Biden pudì segirar, quai fan ora total 26 vuschs d'electurs. Ma er en il stadi federativ da Georgia na datti anc betg in cler victur. Per gudagnar il presidi dovri 270 vuschs electoralas. Stan actual vegn Joe Biden sin 253 e Donald Trump sin 213 vuschs.

video
Trump pretenda dad avair gudagnà l'elecziun
Or da News-Clip dals 04.11.2020.
laschar ir

Probabel status quo en il congress

En la chombra dals represchentants salvan ils democrats la maioritad. En il senat probablamain ils republicans.

Il ticker è a fin

  • 10:04

    Co vai vinavant?

    La dumbraziun da las vuschs en ils stadis federativs decisivs Georgia, Wisconsin, Michigan e Pennsylvania dovran anc pli ditg. Il guvernatur da Pennsylvania, il democrat Tom Wolf, ha declerà sin Twitter che passa in milliun cedels – che sajan vegnids tramess per posta – na sajan anc betg dumbrads.

    En tscherts Counties da Pennsylvania ed er citads da Georgia datti uss ina pausa. La dumbraziun da vuschs vegn cuntinuada damaun marvegl (temp local).

  • 9:31

    Tgi daventa president?

    Er pliras uras suenter ch'ils locals electorals han serrà, n'èsi betg cler, tgi che daventa il 46avel president dals Stadis Unids. Er las medias americanas sa tegnan enavos da proclamar in victur. Tenor stan actual n'ha nagin dals dus candidats cuntanschì la maioritad necessaria da 270 vuschs.

    Matematicamain han omadus candidats anc la pussaivladad da gudagnar l'elecziun. Cunzunt ils cedels electorals ch'èn vegnids tramess per posta pudessan anc midar il resultat en favur da Biden. Ordavant avevan numnadamain surtut ils democrats annunzià da vulair votar per correspundenza.

    Cun in resultat definitiv n'èsi uschia betg da quintar las proximas uras. Er perquai che las dretgiras vegnan probabel anc a sa fatschentar cun l'elecziun.

  • 9:15

    Arizona va a Biden

    Il candidat dals democrats gudogna en il stadi federativ dad Arizona che valeva sco bastiun dals republicans. Quai rapporta l'agentura da novitads AP.

  • 9:02

    L'elecziun n'è anc betg decidida – malgrà la pretensiun da Trump

    Actualmain n'èsi betg cler, cura ch'igl è da quintar cun in resultat final. Fin uss n'èn betg tuttas vuschs dumbradas – cunzunt betg en Swing States sco Pennsylvania, Wisconsin e Michigan.

    Stan actual: Joe Biden vegn sin 220 vuschs, Donald Trump sin 213. Necessarias per gudagnar l'elecziun èn 270 vuschs electoralas.

    video
    Peter Düggeli davart il pled da Trump
    Or da News-Clip dals 04.11.2020.
    laschar ir
  • 8:36

    Trump: «Nus avain gudagnà»

    Il president en uffizi annunzia en la televisiun ch'el haja gudagnà l'elecziun. Trump pretenda ch'el haja gudagnà a Georgia ed a Pennsylvania. Dentant n'èn quests stadis anc betg dumbrads. Nagin emettur n'ha fin uss confermà.

    Plinavant ha Trump ditg ch'ils democrats hajan savì ch'els na possian betg gudagnar ed emprovian uss dad engular la victoria. El ha ditg ch'el veglia ch'il Supreme Court frainia la dumbraziun.

    video
    Trump pretenda d'avair gudagnà
    Or da News-Clip dals 04.11.2020.
    laschar ir
  • 7:51

    Biden reconquista in district da Nebraska

    President Trump ha tenor l'agentura da novitads AP gudagnà 4 da las 5 vuschs electoralas da Nebraska. Biden survegn 1 vusch. Avant quatter onns eran anc tut las vuschs idas als republicans.

    Nebraska e Maine èn ils sulets stadis federativs che repartan lur vuschs electoralas.

  • 7:31

    Trump gudogna a Texas

    Ulteriuras 38 vuschs per Trump. El gudogna a Texas. Dapi decennis va il stadi en il sid als republicans. El na vala betg sco Swing State.

  • 7:13

    Trump gudogna a Montana ed annunzia in statement

    Il president en uffizi gudogna 3 ulteriuras vuschs a Montana. Suenter ses contrahent Joe Biden annunzia er el bainprest in statement. Sin Twitter discurra el gia dad ina gronda victoria.

  • 7:10

    Nancy Pelosi defenda ses sez en il congress

    La pledadra da la chombra dals represchentants, la democrata Nancy Pelosi, defenda ses sez. Ella ha cleramain gudagnà en ses circul electoral en la California. Quai rapporta l'agentura da novitads AP.

    Tenor calculaziuns da plirs emetturs èn ils democrats sin buna via da tegnair lur maioritad en la chombra dals represchentants.

    Politicra.
    Legenda: La democrata Nancy Pelosi. Keystone
  • 7:05

    «Trump e Biden pon anc adina omadus gudagnar»

    Tenor l'expert da SRF, Beat Soltermann, procuran la finala ils resultats en ils quests trais Swing States per la decisiun: Michigan, Wisconsin, Pennsylvania. Dentant er a Georgia – là vegnan las vuschs pir damaun ad esser dumbradas a fin.

  • 6:52

    Biden: «Nus essan optimistics»

    En ses pled en la televisiun è Joe Biden optimistic da gudagnar l'elecziun. El haja adina ditg ch'i possia ir in zic pli ditg enfin ch'i dettia in resultat.

    video
    Biden: «Nus essan sin buna via»
    Or da News-Clip dals 04.11.2020.
    laschar ir
  • 6:49

    Florida va a Trump

    Donald Trump gudogna l'impurtant Swing State Florida ed uschia 29 ulteriuras vuschs.

  • 6:24

    Biden vul dar in statement

    Per las 6:45 (temp svizzer) ha Joe Biden annunzià in statement. Quai ha communitgà ses team da campagna. Davart il cuntegn na datti naginas indicaziuns.

  • 6:19

    Biden gudogna a Hawaii e Minnesota

    Sco spetgà gudogna Joe Biden la maioritad a Hawaii (4 vuschs). Quai rapporta l'agentura AP. Tenor agenturas va er Minnesota (10 vuschs) a Biden.

  • 6:08

    «Nagin republican è vegnì president senza Ohio»

    In'ulteriura surpraisa pussibla na datti para betg per ils democrats ad Ohio. Il stadi federativ va sco gia avant quatter onns a Trump. Quai rapportan plirs emetturs sco CNN e Fox News. Per Trump fiss quai ina victoria impurtanta – er perquai: «Nagin republican è vegni president senza gudagnar ad Ohio», di l'expert dad SRF Arthur Honegger.

  • 5:47

    Democrats salvan maioritad en la chombra dals represchentants

    Tenor prognosas dals emetturs NBC e Fox News han ils democrats vinavant ina maioritad en la chombra dals represchentants. Fin uss muntava la maioritad dals democrats a 232 dals 435 sezs.

  • 5:44

    Republicans gudognan sez impurtant en il senat

    En il cumbat per la maioritad en il senat ston ils democrats magunar ina terrada: il republican Lindsey Graham po defender ses sez a South Carolina cunter ses contrahent Jamie Harrison. Quai rapportan medias localas.

    Il resultat a South Carolina è ina terrada per la speranza dals democrats da survegnir ina maioritad en il senat.

    Senatur.
    Legenda: Il senatur republican Lindsey Graham. Reuters
  • 5:29

    Focus va en direcziun da «Rust Belt»

    Tenor stan actual è Trump meglier en cursa che bleras retschertgas han spetgà. Probabel vegn el a tegnair Florida. A North Carolina vesi ora sumegliant. Ed er a Georgia n'èsi betg sa quintar cun ina surpraisa democratica.

    Uschia sa drizza il focus sin ils Swing States en il Midwest. Ad Ohio pari da dar ina cursa stretga. Sche Biden gudagnass qua, fiss el puspè cler favorit. Dentant fiss quai ina surpraisa. L'ultim temp ha Ohio mussà cleramain ina tendenza republicana.

    Er senza Ohio po il democrat anc far la cursa, sch'el gudogna a Pennsylvania. Dentant èsi là da quintar cun dumbrar tut las vuschs.

  • 5:23

    Missouri ed Utah per Trump, New Hampshire per Biden

    Sco spetgà gudognà Trump en il stadi federativ da Missouri, il medem vala per Utah. Quai rapportan medias localas. Percunter va New Hampshire a Biden.

  • 5:19

    «I vegn stretg»

    Tenor Beat Soltermann, expert da SRF èsi cler che la cursa per la Chas'alva vegn ad esser stretga. Fin uss n'haja dà naginas surpraisas. Trump haja cunzunt gudagnà en il sid dal pajais, Biden en il nordost – sco spetgà. Tgi che gudogna en ils Swing States, è anc avert.

Daco voteschan ils Americans adina in mardi?

Textbox aufklappenTextbox zuklappen

Las elecziuns dal president dals Stadis Unids èn adina il mardi suenter l’emprim glindesdi dal november. Quai ha il congress american fixà l'onn 1875. Il cumenzament da november saja il temp ideal. Ils purs hajan lura schon racoltà. Vinavant na saja l'aura anc betg uschè nauscha, che persunas en regiuns periferas na pon betg ir a votar.

Il di da votaziun hajan ins decidì uschia: Il glindesdi saja in di da viadi, la mesemna e la sonda haja dà fieras, il venderdi saja stà in di da preparaziun per la fiera da la sonda. La gievgia era gia lura il di d'elecziun en la Gronda Britannia – da lez temp l'inimi dals Stadis Unids. La dumengia èn ils Americans ids a messa. Uschia è mo restà il mardi.

RTR actualitad 17:00+

Artitgels legids il pli savens

Scrollar a sanestra Scrollar a dretga