Filip Vallois è stà l'entira dumengia saira avant la televisiun ed ha persequità las elecziuns e las discussiuns davart ils resultats. L'aderent dal president en uffizi, Emmanuel Macron, è cuntent che lez haja in'avantatg da bun 4% sin la gronda concurrenta, Marine Le Pen. I avessi pudì vegnir mender.
Ch'i vegn tar il duel tranter Macron e Le Pen n'è nagina surpraisa. Far ina prognosa per il segund scrutini saja dentant grev. En ses conturn enconuscha Filip Vallois nagins aderents da Marine Le Pen. Ins audia dentant da persunas che vulan nagin dad els dus. Uschia saja er pussaivel ch'i dat dapli persunas che spetgà, che na van betg a vuschar en il segund scrutini, manegia l'um da 36 onns.
Filip Vallois dat sia vusch a Macron – sco avant tschintg onns
L'um da 36 onns è naschì e creschì si en Frantscha. Actualmain viva el ad Annecy, datiers dal cunfin svizzer. Cunquai che sia mamma è da Sent discurra el dentant er rumantsch. Filip Vallois è ina persuna interessada en la politica ed el spera che Emmanuel Macron resta president da la Frantscha. El saja giuven, ina persuna dinamica e haja era ina buna relaziun cun il rest da l'Europa. Quai plaschia ad el vid il president actual.
Da Marine Le Pen na tegn el betg uschè bler. Ella na saja dentant betg pli uschè extrema sco avant tschintg onns. Tar l'elecziun actuala datti cun Éric Zemmour in candidat anc pli extrem dretg. Uschia saja Le Pen vegnida pli quieta, ma ses program saja anc adina in program fitg dretg cunter esters, cunter l'Europa e cunter la pressa. Ina Frantscha cun Le Pen sco presidenta na vul el gnanc s'imaginar.
Duel tranter Macron e Le Pen
Dapi il 2017 è Emmanuel Macron president da la Frantscha, da questa naziun cun ina populaziun da bun 67 milliuns persunas. Resta el president u betg? Daniel Voll, correspundent da SRF en Frantscha quinta cun in duel tranter il president en uffizi e Marine Le Pen da la partida dretg-extrema «Rassemblement National». Las retschertgas mussan ch'i dat probabel ina cursa tranter questas duas persunas – sco gia avant tschintg onns. La differenza saja dentant ch'i na vegn betg anc ina giada a dar in resultat uschè cler. Lura aveva Macron survegnì dus terzs da las vuschs en il segund scrutini. Questa giada quinta Daniel Voll cun in resultat fitg stretg.
Il pajais è ruschnà a la dretga
Ed il correspundent da SRF agiunta, ch'iI mund politic en Frantscha saja sa midà ils ultims onns. Il pajais saja ruschnà a la dretga pervia che temas sco la migraziun u la segirezza hajan fatschentà la populaziun durant ils ultims onns.
Il tema il pli preschent durant il cumbat electoral è stà l'inflaziun en Frantscha. E Marine Le Pen è stada l'emprima politicra ch'haja prendì serius quest tema. Emmanuel Macron è cun retard lura era siglì sin quest char.
