Siglir tar il cuntegn

Header

cuntegn

Elecziuns Stadis Unids Ron DeSantis sa retira e sustegna Donald Trump

Il guvernatur da la Florida, Ron DeSantis, sa retira da la cursa per daventar candidat dals republicans per la presidenza. Quai ha communitgà il politicher ultra-conservativ sin la plattafurma X. El desistia e sustegnia uss ses anteriur concurrent Donald Trump.

Der Gouverneur von Florida, Ron DeSantis, bei einer Wahlkampfveranstaltung.
Legenda: Ron DeSantis sa retira da la cursa e sustegna uss Donald Trump. Keystone

Donald Trump ha gratulà a DeSantis per sia «buna campagna» – malgrà che l'anteriur president dals Stadis Unids aveva sur plirs mais fatg beffas da DeSantis.

Pre-elecziuns

Avrir la box Serrar la box

Sin basa da las pre-elecziuns en ils Stadis Unids decidan las partidas, tgi ch'ellas tramettan en la cursa per daventar presidenta ubain president dal pajais. Las pre-elecziuns han lieu mintgamai en ils stadis federativs – e quai dal schaner enfin il zercladur. In termin impurtant è là il «Super Tuesday». Durant quest di – quest onn ils 5 da mars – han lieu las pre-elecziuns en plirs stadis en il medem mument.

Sin basa dals resultats en las pre-elecziuns decidan las duas partidas grondas lura, tgi ch'è lur candidat uffizial. Quella decisiun vegn fatg a chaschun d'in di da partida. L'occurrenza dals democrats ha lieu ils 19 fin 22 d'avust, ils republicans ils 15 fin 18 d'avust.

Uschia resta be pli l'anteriura ambassadura tar las Naziuns Unidas, Nikki Haley, sco concurrenta da Trump. La proxima pre-elecziun dals republicans è a New Hampshire. Tenor pliras retschertgas vala Donald Trump cleramain sco favurit per la candidatura republicana. La elecziun dal president dals Stadis Unids ha lieu ils 5 da november.

Or da l'archiv

Co funcziunan las elecziuns en ils Stadis Unids da l'America? Il «Minisguard» aveva declerà quai l'onn 2016. Ils candidats e las candidatas èn sa midadas, il sistem è dentant anc adina il medem.

video
Pre-elecziuns en ils Stadis Unids da l'America
Or da Minisguard dals 05.03.2016.
laschar ir. Durada: 2 minutas 46 Secundas.

RTR novitads 06:00

Artitgels legids il pli savens