En ils Stadis Unids è il ristg evità ch'il pajais n'avess gì en paucs dis nagins daners pli, fiss pia daventà insolvent. Suenter la chombra dals represchentants, ha uss er il senat american deliberà ina lescha per abolir il limit superiur da debits, da var 31 billiuns dollars, fin al 2025. La decisiun en il senat è crudada cun 63 cunter 36 vuschs. En la debatta per la lescha han ils republicans cuntanschì ch'expensas èn vegnidas reducidas. Als democrats èsi reussì da defender projects politics impurtants dal president Joe Biden.
Il motiv per il drama da debits
En ils Stadis Unids da l'America fixescha il parlament en intervals irregulars in limit maximal da daivets e determinescha cun quai quants daners ch'il stadi dastga emprestar. Questa giada è il process vegnì duvrà per cumbats da foss ideologics tranter democrats e republicans.
Ils republicans ch'han dapi il schaner ina maioritad en la chasa dals represchentants han refusà durant bleras emnas d'auzar la limita maximala dals daivets e pretendì cleras reducziuns da las expensas statalas. Els han argumentà che las expensas da la regenza na sajan betg sut controlla ed hajan cuntanschì ina dimensiun nunresponsabla. Ils democrats han puspè renfatschà als republicans da ristgar in desaster economic mo per sa profilar politicamain.
Il deal
Il president american Joe Biden ed il parsura republican en la chasa dals represchentants, Kevin McCarthy, avevan cumbattì las emnas passadas en tractativas zaias per in cumpromiss sur las partidas e preschentà pir la fin d’emna passada in deal. Quel prevesa che finanzas federalas ch’ils democrats vulevan engrondir sut Biden vegnian facticamain schelentadas. Persuenter vegnan adattads ils budgets da bleras autoritads federalas e dals ministeris. Ils republicans han era pudì far valair che retschaviders da tschertas prestaziuns socialas stoppian cumprovar ina lavur. Ils democrats vulevan atgnamain augmentar las entradas statalas cun incassar taglias pli autas per ritgs. Cunter quai èn ils republicans sa dustads.
Nagin na survegn en ina tractativa tut quai ch’el vul.
Cun il deal èn blers democrats sco era republicans malcuntents. Democrats sanesters lamentan scursanidas en il sectur social. Republicans da la dretga na van ils respargns betg lunsch avunda. Ed era blers politichers moderads d'omaduas partidas n'èn insumma betg intgantads. En vista a las consequenzas dramaticas tras ina perdita da pajaments, han la finala dentant avunda commembers dal congress ord omadus champs vuschà per il deal ed han uschia segirà la maioritad necessaria en il parlament.
