Siglir tar il cuntegn

Exteriur En memoria da Jo Cox

Per in'ura è la debatta enturn la votaziun da Brexit stada airi - almain sin il Trafalgar Square a Londra. Millis da persunas èn sa regurdadas a la parlamentaria Jo Cox ch'è vegnida mazzada gievgia passada a mesa via. Perfin la purtadra dal Premi Nobel Malala Yousafzai ha undrà ses engaschi.

Il maletg mussa persunas cun fotografias e placats che sa regordan da Jo Cox
Legenda: Ina commemoraziun paschaivla per la parlamentaria Jo Cox en il center da Londra. RTR/nc

15 uras avant che la Gronda Britannia decida davart ses avegnir cun u senza l'Uniun europeica hai dà muments pli pensivs en il center da la metropola. Cun blera musica, videos e placats ha la famiglia da Jo Cox vulì far attent sin l'engaschi da la politicra ch'avess gì oz 42 onns.

#LoveLikeJo

Sut il motto «Viva sco Jo e charezza sco Jo» saja impurtant da persequitar vinavant las finamiras da Jo Cox e da s'engaschar per persunas a l'ur da la societad. Quai ha surtut Malala Yousafzai accentuà - ella che ha survegnì il Premi Nobel da la pasch per ses engaschi per uffants, suenter ch'ella aveva survivì in'attatga dals taliban.

Ella è vegnida mazzada pervi da ses engaschi politic.
Autur: Brendon CoxUm da Jo Cox

La parlamentaria da la partida Labour era surtut s'engaschada vehementamain per ina politica da fugitivs pli liberala e per che la Gronda Britannia restia en l'Uniun europeica.

Tge influenza che la mort da Jo Cox ha sin la votaziun da Brexit en la Gronda Britannia è dispitaivel. Ils ultims dis èn las vuschs che vulan restar en l'Uniun europeica en scadin cas vegnidas pli fermas. Votantas e votants decidan gievgia, ils 23 da zercladur.

L'um che duai avair mazzà Jo Cox è en arrest d’inquisiziun. El para d’esser in fanaticher politic.

RR novitads 20:00

Legende: Video Commemoraziun Jo Cox abspielen. Laufzeit 1:23 Minuten.
Dals 22.06.2016.